DILI, 22 abríl 2024 (TATOLI)–Diretór Servisu Edukasaun Munisipiu Dili, Sabino da Costa, hateten atribuisaun orsamentu ba programa merenda eskolár ba eskola Ensinu Báziku Filiál (EBF) Faról ne´ebé hetan de’it osan loron lima nian ne’e, tanba bazeia ba totál númeru estudante ne´ebé iha.
Notísia Relevante: Lansamentu merenda eskolár afeta estudante EBC Faról tuir ezame tuur iha rai
“Eskola ne’ebé ho númeru estudante boot ne’e labele fó osan dala ida. Atribuisaun osan ba loron hira-hira ne’e la’ós kestaun, maibé importante nia ezekusaun mak tenke to’o loron 130,” nia hateten ba Agência Tatoli, iha nia kna’ar fatin, Comoro, segunda ne’e.
Nia hatutan, osan ne’e haruka ona iha kada eskola nia konta bankária entaun depende ba jestaun ne’e, tanba ne’e laiha problema.
Entretantu, Koordenadór Eskola Báziku Filiál (EBF), Aimutin, Rogério Soares, hateten iha segunda (22 abríl 2024) ohin ne’e, eskola ne´e hahú implementa ona merenda eskolár.
“Osan tama ona no ohin ami hahú ona implementa merenda eskolár. Osan ne’ebé simu no atende ba EBF ida-ne’e hamutuk $1.806 ba estudante hamutuk 1.032,” nia dehan.
Dadus estudante Munisípiu Dili nian ne’ebé mak Agência Tatoli asesu ne´e, totál estudante hosi edukasaun Pre-Eskolár no ensinu báziku públiku no privadu hamutuk 49.262 ne’ebé kompostu husi estudante Eskola Ensinu Báziku (EB) hamutuk na’in- 45.291, EB Públiku na’in-38.478 ne´ebé kompostu husi mane 20.015 no feto 18.463, eskola ensinu báziku privadu hamutuk na’in-6.813 ne´ebé kompostu hosi mane 3.683 no feto hamutuk 3.130.
Dadus estudante hosi edukasaun Pre-Eskolár (EPE) hamutuk 3.971, husi eskola Pre-Eskolár Públiku ho totál estudante hamutuk na’in-1947 ne´ebé kompostu husi feto hamutuk 999 no mane hamutuk na´in-948.
Husi eskola ensinu Pre-Eskolár Privadu hamutuk na’in-2021 ne’ebé kompostu husi mane hamutuk 1.002 no feto hamutuk 1.022.
Antes ne´e, Governu prevee Orsamentu Jerál Estadu (OJE) 2024 hamutuk $54.409,666 ba Ministériu Edukasaun (MAE),
Jornalista : Osória Marques
Editór : Cancio Ximenes
