Deputadu CNRT husu Autoridade aselera operasaun Aero Dili bá Oé-cusse
DILI, 22 abríl 2024 (TATOLI)-–Deputadu Bankada Governu, Congresso Nacional da Reconstrução Timorense (CNRT), iha Parlamentu Nasionál (PN), Firmino Taeki, husu Autoridade Rejiaun Administrativa Espesiál Oé-cusse Ambeno (RAEOA) atu aselera prosesu operasaun aviaun Aero Dili, ho rota Dili bá Oé-cusse no Oé-cusse mai Dili.
“Oportunidade ida-ne’e, apresia ho serbisu Prezidente Autoridade RAEOA nian, tanba durante ne’e deteta ona problema balun iha ne’ebá. Iha bibán ne’e, ha’u hakarak ko’alia hapara ona operasaun aviaun ZEESM nian, no rona mós sai iha mídia atu subtitui aviaun ne’e, Aero Dili mak sei halo operasaun, ne’ebé iha bibán ne’e ha’u husu atu aselera lalais prosesu ne’e hodi fasilita viajen populasaun sira,” Deputadu hato’o liuhusi reuniaun plenária iha Parlamentu, segunda ne’e.
Deputadu ne’e husu mós Aero Dili bainhira halo operasaun karik, hatun presu billete nune’e entidade hotu bele halo viajen, la’ós de’it ba klase boot de’it.
Notísia relevante : Aero Dili troka aviaun ZEESM semo bá Oé-cusse
Iha biban hanesan, Vise-Ministru ba asuntu Parlamentár, Adérito Hugo da Costa, hateten, Governu liuhusi koordenasaun ho Prezidente Autoridade RAEOA hafoin suspende aviaun ZEESM orienta kedas atu priense konetividade Dili no Oé-Cusse atu labele mamuk.
“Orientasaun klaru ba Prezidente Autoridade atu buka kontrata kompañia aero foun hodi mínimu ligasaun Aero Dili ho Oé-cusse semana ida dala-rua ho presu labele a’as liu $25, maibé detallu liu kompeténsia Prezidente Autoridade. Oras ne’e halo hela serbisu atubele implementa orientasaun Governu sentrál nian nesesidade hodi priense espasu aeru ho presu baratu,’’ nia tenik.
Jornalista : Nelson de Sousa
Editora : Julia Chatarina
