ERMERA, 22 abríl 2022 (TATOLI)–Prezidente Komisaun Nasionál Eleisaun (CNE, sigla portugés), José Belo, hamutuk ho nia ekipa, segunda ne’e, halo vizita kortezia ba Prezidente Autoridade Munisípiu (PAM) Ermera, José Martinho Santos Soares, hodi diskute kona-ba preparasaun ba eleisaun munisipál ne’ebé sei akontese iha tinan 2025 no 2026.
“Atividade ne’ebé ohin ita halo nu’udar programa CNE nian, hafoin ita-nia PAM sira simu pose ita vizita sira hodi fó felisitasaun no aprezenta mós ami-nia Diretór no funsionáriu CNE iha munisípiu Ermera, oinsá halo kooperasaun serbisu no preparasaun ba eleisaun munisipál sira ne’ebé sei akontese iha futuru mai koordena ho PAM, ita halo sosializasaun edukasaun sívika ba komunidade hahú husi nasionál to’o rurál hodi hatene importánsia partisipa iha eleisaun ne’e,” Prezidente CNE hateten, edifísiu PAM Ermera, Gleno.
Nia dehan, CNE halo atividade importante tebes maski halo de’it preparasaun ba eleisaun nian, maibé partidu polítiku no líder lokál sira mós husu atu CNE harii fatin ka salaun boot ruma hodi fasilita partidu polítiku sira halo atividade hanesan reuniaun no seluk tan.
“Iha enkontru ohin, ami mós hato’o pedidu ba PAM, karik programa sira ne’ebé atu apoia ba instituisaun sira bele inklui mós CNE atu iha posibilidade halo konstrusaun ka reabilita fatin ruma, liu-liu salaun ne’ebé ho fasilidade hodi bele akomoda partidu polítiku sira halo reuniaun no konferénsia,” nia akresenta.
Notísia relevante : CNE prepara matéria edukasaun sívika ba eleisaun munisipál
Durante enkontru ne’e, Prezidente CNE hato’o ba PAM katak daudaun halo hela levantamentu ba suku, ne’ebé sei realiza eleisaun suku iha tinan ne’e no halo sosializasaun kona-ba edukasaun sívika husi nasionál to’o rurál, nune’e entidade hotu bele informadu hodi halo preparasaun ba eleisaun sira tuir mai.
“Antes to’o eleisaun, ita-nia populasaun tenke apar, nune’e iha futuru mai bele hili líder ho rasionál no responsabilidade tanba iha kompetisaun eleisaun ne’e la’ós nasionál de’it mak mai maibé Ermera-oan rasik mak sei kompete,” nia nia esplika.
Aleinde ne’e, preparasaun ba eleisaun munisipál ba munisípiu hotu iha direitu no iha prioridade ne’ebé hanesan, maibé depende ba preparasaun téknika ne’ebé sira iha, ne’ebé la’ós orsamentu de’it maibé mós tenke iha rekursu umanu kualifikadu, liu-liu área jestaun no finansa ninian atu akumula ema hotu nia hanoin. Hirak ne’ebé preparadu bele hahú hakat ba eleisaun.
Iha fatin hanesan, PAM Ermera, José Martinho Santos Soares, agradese ba vizita no felisitasaun.
“Ami-nia enkontru ohin ne’e, ko’alia kona-ba asuntu serbisu kooperasaun entre CNE no PAM Ermera, liu-liu liga ba edukasaun sívika tanba ita-nia komunidade preparadu tuir eleisaun no labarik sira ne’ebé tinan foin to’o atu tuir eleisaun. Ida-ne’e presiza tebes ba ita atu fó formasaun atu sira iha koñesimentu tanba ita-nia komunidade ne’ebé hela iha área remota sira falta tebes informasaun tanba la to’o ba sira-nia fatin,” José Martinho dehan.
Nia konsidera, edukasaun sívika importante ba komunidade tanba bainhira laiha informasaun sira hanoin eleisaun ne’e la importante.
“Ami munisípiu prontu kolabora ho CNE, bainhira de’it CNE hakarak tun terrenu halo sosializasaun ba edukasaun sívika iha suku ka aldeia, ami prontu koopera inklui mós ba fatin ami prontu atu apoiu,” nia tenik.
Administrasaun Ermera rasik halo hela esforsu ba preparasaun eleisaun munisipál hanesan kria kondisaun mínimu ba rekursu umanu, edifísiu, fasilidade no seluk tan.
Munisípiu Ermera rasik iha totál populasaun hamutuk 139.000, ho númeru eleitór 70.000 resin.
Jornalista : Arminda Fonseca
Editora : Julia Chatarina
