STAE hahú distribui ona materiál eleisaun suku ba munisípiu haat
DILI, 22 abríl 2024 (TATOLI)–Sekretáriu Tékniku Administrasaun Eleitorál (STAE), segunda ne’e, hahú distribui ona materiál sensitivu no la sensitivu hanesan buletin votu, livru rejistu no seluk tan, ba eleisaun suku 10, ne’ebé sei realiza iha loron 27 abríl tinan ne’e.
“Buletin votu ne’ebé Gráfika Nasionál entrega ohin, ita distribui ba munisípiu haat hodi distribui ba suku 10 ne’ebé sei realiza eleisaun iha loron 27 abríl ne’e, ba Dili bulletin votu hamutuk 3.601.794, Aileu 1.338, Manatuto 1.345 no Viqueque 866. Ita distribui materiál ba munisípiu ohin no iha loron 26 abríl mak parte munisípiu sei fahe tan ba aldeia sira-ne’ebé sei realiza eleisaun,” Diretór Jerál STAE, Elviro Fernandes Moniz, hateten, liuhusi ninia diskursu iha edifísiu STAE, Caicoli.
Nia husu atu Autoridade lokál, Polísia Nasionál Timor-Leste (PNTL) asegura materiál sira nune’e bele to’o ho kondisaun di’ak iha munisípiu.
“Ha’u husu mós ba populasaun husi suku 10 ne’ebé sei partisipa eleisaun tenke hili líder ne’ebé bele halo dezenvolvimentu ba imi-nia suku,” nia akresenta.
Notísia relevante : Eleitór 33.176 husi suku 10 sei partisipa eleisaun iha fulan ne’e
STAE rejista ona observadór hamutuk 35 husi nasionál no internasionál maka sei akompaña eleisaun ne’e.
Iha biban hanesan, Diretór Jerál Dezentralizasaun Governu Lokál husi Ministériu Administrasaun Estatál (MAE), António Guterres, husu parte atu PNTL asegura transporte no salva materiál eleisaun ho di’ak to’o fatin destinasaun.
“Ha’u mós husu ba STAE atu serbisu hamutuk ho Autoridade lokál sira hodi garante eleisaun ne’e la’o ho susesu, husu ita hotu nia apoiu hodi garante imparsialidade iha eleisaun suku,” nia apela.
Nune’e mós, Reprezentante Sekretariadu Tékniku Administrasaun Eleitorál (STAE), Odete Maria Belo, hateten, parte STAE sei halo supervizaun nune’e eleisaun suku ne’e bele la’o ho susesu.
Tuir dadus eleitór ne’ebé STAE halo ona sinkronizasaun hodi ezerse sira-nia direitu votu iha eleisaun suku 10 iha hamutuk 33.176.
Jornalista : Arminda Fonseca
Editora : Julia Chatarina
