DILI, 22 abril 2024 (TATOLI)– Fundu Emerjénsia Labarik ba Nasaun Unida iha Timor-Leste (UNICEF, sigla ingles) entrega ekipamentu aquasafeWSL50 no reajente ba ospitál no sentru saúde hosi munisipiu Ainaro, Aileu, Bobonaro, Baucau, Covalima, Ermera, Lauten, Liquiça, Manatuto, Manufahi, Viqueque, Rejiaun Administrativu Espesiál Oé-Cusse Ambeno inklui Ataúro hodi halo teste ba kualidade bee moos.
Reprezentante UNICEF iha Timor-Leste, Bilal Aurang Zeb Durrani, hateten ekipamentu teste ba kualidade bee merak no temperatura bee hodi halo teste kímiku atu nune’e bele hatene bee ne’e kontaminadu ho produtu kímiku no biolojikál hanesan fo’er animal ka ema-nian.
Notísia Relevante:MS-USAID no UNICEF lansa projetu apoiu orsamentu haforsa sistema saúde iha TL
“Setór Saúde, Bee Saniementu no Ijiéne (BESI) nu’udár setór dezenvolvimentu rua ne’ebe bo’ot. BESI iha Fasilidade Kuidadu Saúde (FKS) globalmente sai ona nu’udar sub-setór ne’ebé importante tebes. Ida ne’e tanba fasilidade BESI ne’e bele funsiona di’ak husi kada FKS kontribui ba iha objetivu dezenvolvimentu sustentável (ODS),” nia hateten iha Otél Timor Dili.
Reprezentante UNICEF iha Timor-Leste ne’e, hateten hosi programa BESI no Fasilidade Kuidadu Saúde (FKS) sei fó impaktu direta ba kualidade servisu saúde nian, inklui seguransa pasiente no pesoál saúde sidadaun sira-nian.
Tanba tuir planu ODS nian iha númeru tolu, deskreve kona-ba saúde no promove moris di’ak ba ema ho idade hotu-hotu. No iha númeru neen iha planu ODS mós hateten atu garante disponibilidade moris di’ak.
Iha fatin hanesan Diretór Servisu Saúde Munisípiu Bobonaro, Gil Bernardo Vicente, relata durante ne’e, Servisu Saúde Munisípiu Bobonaro, tenki lori amostra bee hodi halo teste iha laboratóriu nasionál tanba seidauk iha ekipamentus adekuadu atu halo teste ba bee moos.
“Ida ba fasilidade saúde ne’ebé mak iha, ami bele utiliza ona ekipamentu sira ne’ebé ohin fó ne’e hodi bele koko mós bee kanalizada iha fasilidade saúde iha postu administrativu hitu iha munisípiu Bobonaru,” Diretór Servisu Saúde Munisípiu Bobonaru, Gil Bernardo Vicente, dehan.
Ohin, Ministériu Saúde ho UNICEF entrega ekipamentu aquasafeWSL50 no reajente hamutuk unidade 13 ba ospitál no sentru saúde hosi munisipiu Ainaro, Aileu, Bobonaro, Baucau, Covalima, Ermera, Lauten, Liquiça, Manatuto, Manufahi, Viqueque, Rejiaun Administrativu Espesiál Oé-Cusse Ambeno inklui Ataúro hodi halo teste ba kualidade bee moos.
Jornalista: Jesuína Xavier
Editor: Agapito dos Santos
