VIQUEQUE, 23 abríl 2024 (TATOLI)- Autoridade Protesaun Sivil Munisípiu Viqueque apoia pakote nesesidade báziku emerjénsia ba vítima inundasaun hamutuk uma-kain 14 iha aldeia Uma-Boot, suku Luca, Postu Administrativu Viqueque.
“Ami fó ona apoia pakote emerjénsia ba ita-nia vítima sira hodi bele utuliza iha situasaun difisil ne’e”, Matias da Silva, hateten ba Agência TATOLI, iha postu Viqueque Vila, ohin.
APC aproxima ba vítima sira bainhira hetan apoiu matéria konstrusaun tenke buka fatin ida ne’ebé labele ameasa ba dezastre naturál.
“Iha distribuisaun pakote emerjénsia ha’u ho ekipa halo ona konkordansia verbal ho família afetadu sira katak vítima sira prontu atu halo deklarasaun konjunta ho eskrita katak sira hakarak muda husi fatin dezastre, ba iha fatin seluk ne’ebé seguru bainhira hetan ona apoiu materiál rekoperasaun”, nia haktuir.
Kona-bá akontesimentu ne’e nia relata, vítima uma-kain 14 ho kategória grau estragu ne’ebé APC verifika aat totál tanba bee nakonu uma laran.
Enkuantu, pakote emerjénsia ne’ebé APC Viqueque distribui kompostu husi foos, mina, supermie, kafé, masin-midar no lona, balde, bikan kanuru no seluk tán.
Materiál konstrusaun APC sei aprezenta ba nasionál hodi hein aprovasaun hafoin distribui ba vítima afetadu sira.
Rekorda fali katak akontesementu inundasaun ne’e akontese iha loron 18 fulan abríl 2024, afeta ba família uma-kain 14 kauza udan boot hodi hamosu inundasaun iha aldeia Uma boot.
Iha distribuisaun pakote emerjénsia ne’e akompaña hosi administradór Postu Administrativu Viqueque Vila, Leopoldo da Costa Alves, ekipa Voluntáriu CVTL sukursál Viqueque.
Notísia relevante:Protesaun Sivíl Covalima alerta ba komunidade hamoos valeta hodi prevene inundasaun
Jornalista:Vitorino Lopes da Costa
Editór : Florencio Miranda Ximenes
