DILI, 23 abril 2024 (TATOLI)–Prezidente Asosiasaun Parteira Timor-Leste (APTL), Lídia Gomes, hateten asosiasaun ne´e prepara ona padraun kompetensia atu regula parteira sira-ne’ebé hakarak servisu iha fasilidade saúde sira iha territóriu.
Nia hateten, profisionál saúde hanesan parteira barak liu hakarak servisu de’it iha kapital, tanba laiha regulamentu ne’ebé regula sira, ne’eduni asosiasaun elabora hela padraun kompeténsia hanesan padraun kompeténsia hanesan baze legal ida ba APTL hodi bele regula profisionál saúde sira.
“Ami husi asosiasaun prepara ona padraun kompeténsia profisaun parteira, ida-ne’e oinsá sira iha kompeténsia kona-ba parteira iha abilidade báziku, étika hodi atendimentu partus ba inan sira no bebé foin moris. Iha mós kompeténsia adisionál tuir programa Ministériu Saúde nian liuliu kona-bá étika, atitude no komportamentu parteira nian ba komunidade,” Prezidente APTL, Lídia Gomes, hateten ba Agência Tatoli liuhosi programa “Entrevista Eskluziva” iha esúudiu Tatoli, Faról.
Nia garante, maske APTL seidauk iha padraun kompeténsia legalizadu iha Ministériu Saúde, membru APTL ne’ebé servisu iha fasilidade saúde sira kontribui di’ak ba iha atendimentu ba komunidade.
Se padraun kompetensia profisaun parteira legaliza, APTL rasik bele fó teste ba iha membru sira liuliu ba iha kapasidade, abilidade no étika ka reavalia sira-nia kompeténsia iha kada tinan lima.
APTL rejistu parteira sira hamutuk 1500-resin no membru ativu iha ospitál, sentru saúde no postu saúde sira hamutuk 800-resin iha territóriu nasionál.
Asosiasaun Parteira Timor-Leste ne´ebé harii iha 20 novembru 2021 ne´e, iha nia vizaun atu halibur parteira hotu-hotu iha Timor-Leste hodi mellora servisu inan no bebé iha fasilidade saúde sira.
APTL iha vizaun mak nu’udar fatin úniku no hamriik mesak, iha autoridade atu legaliza no fó kompeténsia ba iha parteira sira hotu, atu bele apoia asisténsia saúde ho rezultadu progresu profionálizmu parteira iha Timor-Leste.
APTL iha misaun ida katak realiza organizasaun APTL hamriik mesak, kompetetivu no hasa’e kbiit hasa’e profisionál parteira hodi fó asisténsia ho kualidade.
Jornalista : Jesuína Xavier
Editór : Cancio Ximenes
