BOBONARO, 23 abríl 2024 (TATOLI)-klube hamutuk 10 mak rejista no sei kompete iha eventu futeból Holsa Cup, ne’ebé sei realiza iha kampu futeból suku Holsa, postu administrativu Maliana, munisípiu Bobonaro iha loron 02 fulan-maiu tinan 2024.
Xefe suku Holsa, António Santa Cruz, hateten daudaun ne’e preparasaun atinje ona 85%, tanba iha segunda ne’e komisaun organizadora halo ona Tecnical Meeting ho treinadór klubu sira no distribui ona oráriu jogu.
Alende ne’e sei halo mós koordenasaun husi Asosiasaun Futeból Bobonaro (AFB) atu bele iha koñesimentu no apoia eventu ne’e la’o to’o rohan.
Enkuantu klube hirak-ne’e ualu mai hosi aldeia sira iha suku Holsa no rua seluk husi eskola CAFE Maliana no Institutu Off Busines (IOB) Maliana.
Notísia relevante: Autoridade Bobonaro propoin millaun $7-resin ba OJE 2025
“Ita-nia planu abertura ba jogu ida-ne’e sei akontese iha loron 02 fulan-maiu oras tuku 14:30, klubu sira-ne’e ami planu to’o 14 maibé oras ne’e rejistu ona klubu 10,” nia informa ba Jornalista Tatoli iha kna’ar fatin,tersa ne’e.
Santa Cruz afirma, eventu ne’e realiza ho objetivu atu komemora loron restaurasaun independénsia 20 maiu ba dala 22 no anima komunidade suku Holsa.
“Hau atu apela ba joven sira tantu jogador, adeptu no inan-aman sira ne’ebé sei partisipa iha eventu ne’e, atu tau situasaun hakmatek, seguru no kalma atu nune’e ita-nia eventu ne’e bele la’o ho di’ak,” nia apela.
Eventu ne’e realiza liuhusi inisiativa klibur Matadalan ba Apoiu Dezenvolvimentu Suku Holsa no hetan apoia husi Ministériu Juventude, Desportu, Arte no Kultura ho montante rihun $2,500 liuhusi orsamentu desportu komunitária, alende ne’e hetan apoiu mos husi kompania lokál balu ne’ebé tuir kbi’it ne’ebé iha.
Notísia relevante: AFB identifika terinadór 22 partisipa formasaun hosi FFTL
Jornalista: Sérgio da Cruz
Editór: Agapito dos Santos
