DILI, 23 abríl 2024 (TATOLI)—Portavós Gabinete Ministra Edukasaun (ME), Filipe Rodrigues Pereira, hateten posibilidade Ministériu Edukasaun sei loke vaga bolsa kandidatu ba profesór iha fulan-maiu tinan ida-ne´e.
Notísia Relevante: ME posibilidade loke tan vaga bolsa kandidatu profesór tanba valór menus
“Faze daruak ba bolsa kandidatu profesór Ministériu Edukasaun sei koordena ho Komisaun Funsaun Públika hodi loke vaga. Maibé agora haree uluk lai pre-eskolár no ensinu báziku nian ne’e. Espera katak iha fulan maiu nia laran ne’e rejistu ba segundu faze ba sira-ne’ebé mak sei hakarak atu mai compete. Depois rejistu hotu, sei tuir kedas ho teste. Ha’u hanoin ita rezolve fazeadamente,” Portavos ne´e hateten ba Tatoli, iha nia kna’ar fatin Vila Verde, tersa ne’e.
Bainhira fó sai vaga, profesór sira-ne’ebé iha interresse bele konkorre ba vaga bolsa kandidatu ba profesór ho nia rekezitu sira hanesan ho vaga anteriór inklui nafatin uza teste eskrita eletróniku.
“Ida-ne’e ita sei prosesa fazeadamente maibé ita sei prioriza ba bolsa kandidatu profesór ba ensinu báziku. Depois mak ba vaga ensinu sekundáriu jerál nian, tanba ita sei hein kuadru pesoál ba identifikasaun eskola sira hafoin loke ba públiku,” nia dehan.
Diretora Nasionál Rekursu Umanu, Anita Tavares, hateten kandidatu Profesór ne’ebé pasa iha teste eskrita hamutuk 568 ne’e seidauk prienxe alvu lugares 2.400 hosi Ministériu Edukasaun nian.
Ho ida-ne’e, Ministériu Edukasaun hetan autorizasaun husi Konselu Ministru (KM) hodi loke fila-fali vaga bolsa kandidatu profesór ba faze daruak hodi bele kompleta alvu ne’ebé iha.
“Ita sei halo preparasaun no halo oráriu ida hodi prepara no loke fila-fali bolsa kandidatu profesór ba faze daruak ne’e. Ita tenke halo ida-ne’e maibé ami seidauk halo oráriu. Ha’u hanoin iha tempu badak maibe ita tenke preparadu. Ha’u hanoin ida-ne’e ita sei fila-fali faze segundu para kompleta ba iha lugares ne’ebé ke previstu Ministériu Edukasaun halo ona. Ita sei halo avaliasaun no ita hotu haree fila-fali. Tanba ida-ne’e mak presiza tempu ida ekipa tuur hamutuk atu halo avaliasaun, nune’e haree. Ha’u hanoin matéria sira-ne’e ohin ha’u fó sai ona, katak kandidatu sira mós tenke prepara-aan,” nia hateten.
Notísia Relevante: ME sei koloka urjentemente profesór klasifikadu 568 ba eskola sira
Jornalista : Osória Marques
Editór : Cancio Ximenes
