DILI, 06 abríl 2024 (TATOLI)—Ministériu Edukasaun (ME) iha posibilidade loke tan vaga bolsa kandidatu profesór husi pré-eskolár no ensinu báziku tanba nota katak kandidatu sira-nia teste eskrita barak mak ho valór menus.
“Kuandu kandidatu profesór nian valór la to’o alvu mínimu 60, mak tenke loke fali vaga, tanba ita labele kontrola fali. Ha’u hanoin iha posibilidade ita bele loke fali vaga tanba haree ba ekran, kandidatu barak mak ho valór menus husi 50,” Diretór Jerál Edukasaun Pre-Eskolar, Ensinu Báziku, Ensinu Rekorente, Apolinário Serpa Rosa, informa ba Agência Tatoli, sesta (05/04) iha ninia knaar fatin, Vila Verde.
Komisaun Funsaun Públika (KFP) fó sai valór liuhusi ekran no sei haree hamutuk ho ME no organizasaun BELUN, ne’ebé durante ne’e monitoriza prosesu husi inísiu to’o ezame eletrónika.
“Nune’e, komisáriu bolu ami ba Komisaun Funsaun Públika atu haree kolokasaun profesór ba eskola bázika iha territóriu, maibé iha konversa ne’e, ha’u husu se iha ezame ne’e mak valór la to’o alvu, saida mak ita sei halo, komisáriu dehan Komisaun Funsaun Públika nian sei haree. Nune’e, ha’u rekomenda katak bainihira ita ko’alia kona-ba futuru edukasaun mai ho kualidade no iha kualifikadu mak tenke liuhusi teste,”Apolinário Serpa Rosa hateten.
Notísia relevante : Aplikante bolsa rekrutamentu ba profesór 13.021 admitidu atu tuir teste eskrita
Nia haktuir, bazeia ba termu referénsia, iha kandidatu balun konsege to’o valór 100 no balun la konsege, maibé ida-ne’e kompeténsia KFP atu buka mekanizmu hodi solusiona. Nune’e, bainhira to’o loron 16 Abríl mak laiha kandidatu ida mak prense kritériu maka bele loke fali vaga hodi ema bele aplika fali.
“Tuir informasaun katak iha loron 16 Abríl, KFP sei aprezenta lista kandidatu ne’ebé tuir ona teste. Haree ba eskola ne’ebé profesór menus no presiza liu mak iha munisípiu Ermera, Bobonaro, Ainaro mak profesór menus liu, hafoin munisípiu seluk maibé ladún menus. Kolokasaun profesór ne’e depende ba kandidatu ne’ebé eskolla,” nia akresenta.
Tuir observasaun ne’ebé Agência Tatoli iha ekran KFP, hatudu kandidatu maioria menus husi 50, liu-liu iha disiplina siénsia naturál no sosiál.
Totál aplikante ne’ebé aplika ba bolsa rekrutamentu ka kandidatu ba profesór sira hamutuk 14.000-resin maibé ida-ne’ebé admitidu 13.021, kompostu husi feto 7.924 no mane 5.097, enkuantu la admitidu hamutuk 1.131, kompostu husi feto 678 no mane 453.
Programa bolsa kandidatu ba profesór sira implementa bazeia ba dekretu-lei númeru 31/2023 kona-ba Estatutu Karreira Edukadór . Tanba ne’e, ME halo prosesu rekrutamentu bazeia ba kuadru pesoál.
Iha sorin seluk, profesór 1.499 ne’ebé hanorin ona durante tinan-10 termina kontratu iha loron 31 Dezembru 2023 no ME la estende kontratu ho razaun hakarak loke vaga ba públiku hodi hetan profesór kualifikadu.
Jornalista : Osória Marques
Editora : Julia Chatarina
