COVALIMA, HEADLINE

Seidauk hatene kauza husi Amélia nia mate tanba lahalo autópsia

Seidauk hatene kauza husi Amélia nia mate tanba lahalo autópsia

Foto espesiál

COVALIMA, 23 Abríl 2024 (TATOLI) – Amélia de Andrade Gusmão (18), estudante husi Eskola Sekundária Jerál Públiku Suai hakotu iis de repente de’it iha dadeer pur volta tuku 08h00. Médiku Emerjénsia Ospitál Referál Suai, Augusto Adelaide Perreira, informa katak ospitál labele identifika kauza husi vítima nia mate ne’e, tanba liuhusi autópsia mak bele deskobre, enkuantu família la autoriza.

Médiku ne’e relata katak bainhira transporta vítima husi fatin akontesimentu bá ospitál Suai ne’e nia iis laiha ona, tanba ne’e profisionál saúde ne’e lahatene motivu husi nia mate.

“Maske nia hakotu ona iis, ami nafatin esforsu hodi halo diagnóstiku durante oras ida, maibé la konsege salva nia vida, tanba nia to’o iha ospital iis laiha ona, nune’e ita labele identifika nia mate tanba moras saida. Atu identifika kauza husi mate, dalan seluk mak tenke halo autópsia maibé família la hatán”, Médiku Emerjénsia Óspital Referál Suai, Augusto Adelaide Perreira, relata ba Tatoli, ohin.

Iha sorin seluk, matebian nia alin, Octaviana de Andrade, konta tuir kronólojia husi akontesimentu ne’e katak dadersán nia ho nia bin matebian tula malu ho motór bá eskola ho kondisaun ne’ebé di’ak, laiha moras ruma.

Tanba eskola seidauk tama, entaun nia hein hodi han babol, depoizde ne’e nia monu no la konsege tama eskola no matebian nia alin husu ajuda ba profesór sira hodi bolu ambulánsia lori bá ospitál, maibé nia iis laiha ona.

“Ami família konsidera matebian han babol mak hakotu iis, tanba matebian monu tun nia kabeen-mutin sai no ami hasai babol iha nia ibun laran. Ami la hatene rebusadu ne’e nia mak sosa iha kioske ka sé mak fó ba nia”, Octaviana de Andrade konta iha aldeia Lakonak, ohin.

Diretór Eskola Sekundária Públiku Suai Seran Kotek, Ferando Ferreira, triste tanba eskola lakon nia aluna ne’ebé durante ne’e sempre halo tuir regra eskola.

“ Ha’u iha dalan bainhira simu telefone husi profesór katak aluna ne’e monu, nune’e ami lori bá óspita to’o la konsege la salva nia vida. Nia monu tanba saida, eskola lahatene”, nia salienta.

Vítima Amélia de Andrade moris iha loron 22 Janeiru 2006, oan husi Domingos Gusmão no inan Feliciana Andrade. Matebian oan ba da-7 husi maun alin na’in-sia.

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!