DILI, 23 abríl 2024 (TATOLI)–Sekretaria Estadu Formasaun Profisionál no Empregu (SEFOPE) liuhusi Diresaun Nasionál Empregu Estranjeiru (DNEE), serbisu hamutuk ho empreza Tsuneishi Shipbuilding husi Japaun, halo teste ba timoroan hamutuk na’in-36 molok bá serbisu iha Japaun liuhusi programa Technical Intern Trainer (TIT).
Xefe Departamentu Deslokasaun Traballadór SEFOPE, Alarico Fernades, agradese ba Governu Japaun liuhusi empreza Tsuneishi Shipbuilding, ne’ebé mai to’o iha Timor-Leste hodi halo teste ba joven timoroan na’in-36.
“Husu ba partisipante sira ne’e atu aproveita didi’ak hodi bele pasa teste ne’e, tanba atu liu no la liu ne’e bazeia ba prestasaun ema ida-idak nian, no desizaun hotu husi empregadór, SEFOPE liuhusi Diresaun Nasionál Empregu Estranjeiru fasilita de’it,” Alarico Fernades hateten, hafoin halo abertura teste, iha Sentru Nasionál Empregu no Formasaun Profisionál (CNEFP, sigla portugés) Tibar, tersa ne’e.
Notísia relevante : SEFOPE despede timor-oan na’in-hitu ba serbisu iha Japaun faze daruak
Partisipante sira ne’e na’in-15 frekuenta kursu iha área pintura no na’in-21 iha área soldadura, ne’ebé joven sira mai husi sentru formasaun Senai Becora, CNEFP Tibar, no Sentru formasaun Dom Bosco Comoro.
Bainhira kandidatu traballadór sira pasa tiha teste dahuluk, maka sei avansa ba formasaun lian Japaun no teste saúde nian.
“Programa ne’e realiza tanba DNEE serbisu hamutuk ho empregadór Japaun, nune’e sira husu mai parte diresaun no sentru formasaun tolu maka rekomenda kandidatu sira ne’e no hato’o fali ba empregadór,” nia tenik.
Xefe Departamentu fó hanoin ba kandidatu sira-ne’ebé pasa iha teste atu prepara-an didi’ak tanba prosesu tuir mai sei iha teste saúde no formasaun lian, nune’e ba hirak ne’ebé la pasa, labele laran susar tanba oportunidade sei iha.
Jornalista : Antónia Gusmão
Editora : Julia Chatarina
