DILI, 24 abríl 2024 (TATOLI)–Governu liuhusi reuniaun ordinária Konsellu Ministru (KM), kuarta ne’e, aprova projetu rezolusaun Governu kona-ba donativu ho valór rihun $150 ba fundasaun Amílcar Cabral de Cabo Verde.
“Apoia ne’e ho intensaun atu apoia organizasaun ba Komemorasaun Sentenáriu Amílcar Cabral nia moris, ne’ebé sei komemora iha loron 12 setembru 2024,” Ministru Prezidénsia Konsellu Ministru ein ezersísiu, Adérito Hugo da Costa, relata hafoin reuniaun ezekutivu, iha Palásiu Governu.
Amílcar Cabral maka líder revolusionáriu ida husi Guiné-Bissau no Cabo Verde. Nia nu’udar Fundadór no líder Partidu Afrikanu ba Independénsia Guiné no Cabo Verde (PAIGC, sigla portugés), ne’ebé dezempeña papél importante ida iha organizasaun rezisténsia armada kontra kolonializmu no defeza unifikasaun povu gineense no kabuverdianu sira hodi hetan liberdade no sosiedade ida-ne’ebé igualitária.
Notísia relevante : Governu prefere tau ema nu’udar sentru ba dezenvolvimentu nasaun
Fundasaun Amílcar Cabral konvida Timor-Leste atu hola parte iha selebrasaun, ne’ebé ko’alia liu kona-ba lasu amizade, solidariedade no apoiu mútua entre povu sira.
Hodi rekoñese importánsia legadu husi Amílcar Cabral, Governu Timor-Leste hakarak fó onra ninia memória no ninia kompromisu ba luta kontra kolonializmu, ba liberdade no autodeterminasaun povu nian.
Donativu ida-ne’e reflete kompromisu konstitusionál Timor-Leste nian ho prinsípiu independénsia nasionál no direitu povu sira-nian ba autodeterminasaun no independénsia, inklui kooperasaun entre povu sira.
Jornalista : Antónia Gusmão
Editora : Julia Chatarina
