COVALIMA, 24 Abríl 2024 (TATOLI) – Organizasaun Naun-Governamentál Klibur Dezenvolvimentu Sutentavel Timoroan (KDESTO) fahe nesesidade bázika ba ema ho defisiénsia 31 iha suku Lalaua, postu Tilomar, munisípiu Covalima.
Reprezenta diretór KDESTO, Natália de Jesus Perreira, dehan distribuisaun nesesidade bázika hanesan parte ida halo karidade ba ema ho defisiénsia, nune’e sira bele hetan apoiu ruma.
“Ita atu promove no proteje ema ho defisiénsia, KDESTO iha programa lubuk ida ne’ebé define oinsá atu promove ema ho difisiénsia nia direitu hanesan ho sidadaun sira seluk”, Natália Perreita hato’o iha suku Lalaua, ohin.
Nesesidade bázika ne’ebé distribui mak kada ema ida simu foos saku ida ho kilógrama 25, mina litru 500 haat, susu-been Dancow kaixa ida, susu-enaak kalén haat, koto kilógrama rua no fore-mungu kilógrama haat.
Iha serimónia distribuisaun ne’e reprezentante KDESTO mós halo introdusaun kona-ba ezisténsia no misaun organizasaun nian iha Covalima atu tau-matan no projetu direitu ema ho defisiénsia.
Benefisiáriu Ângelo Alves Ximenes sente kontente tanba organizasaun bele fó apoiu nesesidade bázika ba sira, maske la’ós bebeik maibé organizasaun iha hanoin hodi tau-matan ba sira.
Antes ne’e, KDESTO apoia nesesidade bázika ba ema ho defisiénsia hamutuk 36 iha suku Lour, postu Zumalai no 56 iha suku Beco, postu Suai no 54 iha suku Maudemo, posto Tilomar.
Notísia relevante: Ema ho defisiénsia 54 iha Tilomar simu nesesidade bázika
Jornalista: Celestina Teles
Editóra:Maria Auxiliadora
