DILI, 24 abríl 2024 (TATOLI)- Ministru Ensinu Superiór Siénsia no Kultura (MESSK), José Honório Jerónimo Martins, hateten, rekrutamentu estudante ba tinan letivu ne’e loloos Universidade Nasionál Timor Lorosae (UNTL) maibé, politikamente, seidauk bele.
“Loloos ne’e UNTL mak rekruta maibé politikamente sira seidauk prontu tanba uluk sira rekruta departamentu ida maihosi fatin ida loos de’it, seluk laiha. Uluk, sira rekruta husi Munisípiu ida de’it. Tanba ne’e ha’u hateten sira seidauk prontu,” MESSK dehan ba TATOLI, iha nia knaar fatin, Colmera, Dili, tersa ne’e.
MESSK reforsa katak UNTL presiza prepara aan, halo jestaun ho di’ak, tenke halakon rejionalizmu ne’e; tau sentidu nasionalizmu iha uluk para atende ema hotu-hotu.
“Tanba ne’e UNTL tutela mai MESSK entaun, iha kompeténsia no kbiit tomak atu regula sira,” governante ne’e hateten.
Husu preokupasaun UNTL relasiona ho rekursu umanu menus, membru Governu ne’e haktuir katak sira loke kursu mak tenke prepara rekursu, sira loke kursu ba profesór tanbasá mak rekursu menus. Entaun UNTL tenke halo jestaun no prepara rekursu umanu ne’ebé di’ak.
“Loke kursu ruma tenke iha profesór labele loke tiha kursu depois profesór laiha, tau kestaun ba Governu, ne’e labele. UNTL presiza halo jestaun di’ak,” nia friza.
Entretantu, UNTL nu’udar ensinu superiór públiku, harii iha loron 17 novembru 2000, ho lema Sapiente et Veritas ka Siénsia no Verdade.
Notísia relevante:UNTL tenta rezolve dosente menus iha Fakuldade Direitu
Jornalista: Osória Marques
Editór: Rafael Ximenes de A. Belo
