PM husu Embaixadór Luís Sequeira kaer metin prinsípiu hametin kooperasaun ho Moçambique
DILI, 24 abríl 2024 (TATOLI)—Embaixadór foun Estraordináriu no Plenipotensiáriu Timor-Leste ba Repúblika Moçambique, Luís Miguel Lopes de Sousa Sequeira, hasoru malu ho Primeiru-Ministru (PM), Kay Rala Xanana Gusmão, molok desloka hala’o misaun Estadu no iha tempu hanesan hato’o agradesimentu ba konfiansa ne’ebé depozita ba nia.
Aleinde ne’e, simu mós orientasaun polítika hosi Xefe Governu hodi bele hala’o kna’ar nu’udar reprezentante Estadu durante hala’o misaun.
“Importante tebes ba ita-boot nia misaun maka kaer metin prinisípiu Timor-Leste hodi hametin kooperasaun ho Estadu Moçambique. Prinsípiu IX Governu Konstutusionál define nia polítika esterna ho prinsípiu ne’ebé konsagra sentidu independénsia no soberania mak: ‘Ba Timor-Leste, laiha aliadu ka inimigu, hotu-hotu sei hamutuk no AMIGUS de’it!’. Ida-ne’e sai hanesan ita-nia lema, ne’ebé sei orienta ita iha relasaun esterna no konjuntura internasionál sira hodi hametin no simu nasaun hotu,” PM Xanana hateten durante enkontru ho Embaixadór Luís Sequeira, iha Palásiu Governu, kuarta ne’e.
Notísia relevante : Xefe Estadu fó pose ba Luís Sequeira nu’udar Embaxadór TL ba Moçambique
Timor-Leste no Moçambique iha relasaun istórika no kulturál hanesan antigu koloniál portugés. Nasaun rua ne’e estabelese relasaun diplomátika iha tinan 2002, la kleur depois Timor-Leste hetan independénsia to’o agora mantein nafatin relasaun polítika amigável hodi hatudu apoiu ba malu ba dezenvolvimentu no esforsu sira atu harii nasaun.
Embaixadór Luís Sequeira kompromete atu habelar kooperasaun Timor-Leste ho Moçambique iha área prinsipál sira ba kontinuasaun parseria inklui edukasaun kruzada, justisa no kooperasaun jurídika, jestaun rekursu naturál sira, no servisu hamutuk hodi alkansa Objetivu Dezenvolvimentu Sustentavel (ODS).
“Timor-Leste iha kompromisu atu apoia dezenvolvimentu no seguransa Moçambique nian, liuhusi ligasaun fraternál espesiál hanesan nasaun sira ne’ebé ko’alia lian portugés,” nia dehan.
Luís Miguel Lopes de Sousa Sequeira simu pose husi Prezidente Repúblika, José Ramos-Horta iha loron kinta (18/04/2024).
Embaixadór foun ne’e nu’udar profisionál timoroan ida-ne’ebé iha susesu boot tebes iha área analize polítika, koordenasaun programa, kapasitasaun no fortalesimentu institusionál ba organizasaun internasionál sira hanesan Banku Dezenvolvimentu Aziátiku (ADB), Banku Mundiál, no AusAID. Hala’o estudu iha Universidade Nasionál Austrália, inklui iha diplomasia ba asuntu internasionál no polítika públika.
Luís Miguel Lopes de Sousa Sequeira hatudu ona kompromisu kle’an ba edukasaun no dezenvolvimentu profisionál. Nia dezempeña knaar seniór oin-oin, inklui nu’udar Koordenadór Prinsipál ba Asisténsia Téknika ADB ba Bee Timor-Leste husi tinan 2021 to’o 2023, Analista Polítika ba Servisu Bee no Urbanu no Konselleiru Polítika Bee nian iha ADB.
Nu’udar Adidu Edukasaun iha Brazíl ho Ministériu Edukasaun Timor-Leste, Asesór Sénior Polítika Públika ho Sekretáriu Estadu ba Haforsa Institusionál, Asesór Nasionál ba Desentralizasaun ho Banku Mundiál, no Koordenadór Sénior no Pontu Fokál Jéneru ho AusAID. Fluente iha lian tetun, portugés, inglés no indonézia.
Antes ne’e, nia konsege okupa kargu lideransa iha organizasaun desportiva sira.
Jornalista : Antónia Gusmão
Editora : Julia Chatarina
