PN sei kria komisaun eventuál akompañamentu ba Saharawi
DILI, 24 abríl 2024 (TATOLI)—Prezidente Parlamentu Nasionál (PPN), Maria Fernanda Lay, kuarta ne’e, simu audiénsia ho Embaixadór Repúblika Saharawi iha Timor-Leste, Boibat Malanin Boibuat.
Notísia Relevante: PN aprova rezolusaun fó solidariedade ba povu Saara Ocidental
Nia hatutan, Parlamentu Nasionál sei kria komisaun eventual ba Saharawi, tanba embaixadór Sharawi iha Timor-Leste ne´e husu apaoiu atu bele haree ba sira-nia problema.
“Embaixadór mai hetan ho ha’u, para fó hanoin fila-fali ita-nia apoiu ba sira-nia luta ba independénsia, entertantu sira iha problema ho Maroco liga ho sira-nia área ida iha West Saharawi. Ne’ebé, ita espera katak ho apoiu ita-nian, sira mai loby no fó hanoin ita, tanba iha lejislatura sira anterior, ita iha komisaun ida-ne’ebé akompaña probelma Saharawi nian no sira husu para ita forma fila-fali,” Prezidente Parlamentu Nasionál ne´e hato’o ba jornalista sira hafoin ramata enkontru iha sala konferénsia Parlamentu Nasionál.
Tanba ne´e, Prezidente Parlamentu Nasionál (PPN) husu ona ba komisaun B ne’ebé trata asuntu Negósiu Estranjeiru no Defeza ho Seguransa hodi toma atensaun ba asuntu ne’e, atu bele kria komisaun eventuál ba akompañamentu.
“Tanba, komisaun integra liu ba asuntu relasaun internasionál bele apoiu grupu ne’ebé sai ba rai-li’ur, hanesan Uniaun Inter-Parlamentár (UIP), Asembleia Parlamentár CPLP ho sira seluk bele toka asuntu ne’e, iha nível Internasionál,” nia dehan.
Nia hein katak Ministériu Negósiu Estranjeiru no Kooperasaun (MNEK) ba asuntu sira-ne’ebé TL iha apoiu bilaterál ba nasaun sira-ne’ebé sai TL nia parseiru, nune´e tempu badak PN sei kria fila-fali komisaun eventuál akompañamentu.
Jornalista : Nelson de Sousa
Editór : Cancio Ximenes
