VIQUEQUE, 24 abríl 2024 (TATOLI)— Polísia Nasionál Timor-Leste (PNTL) munisípiu Viqueque liuhosi Unidade Polisiamentu Komunitária introdús ba abitante postu Uatucarbau atu garante seguransa iha rai-laran liuhosi kontribui ba pás no estabilidade.
“Sidaudaun hotu iha nasaun Repúblika Demokrátiku Timor-Leste (RDTL) iha dever no obrigasaun hodi kontribui direta no indireta ba asuntu seguransa nasionál, liuhosi kontribui pás no estabilidade atubele kontribui mós ba prosesu dezenvolvimentu nasionál,” hateten Segundu Komadante PNTL munisípiu Viqueque, Inspitór Xefe Domingos Gomes, iha postu Uatucarbau, ohin.
PNTL iha dever mak serbí no halo koordenasaun ho komunidade hodi garante pás no estabilidade iha rai-laran.
“Ha’u hakarak husu ba abitante hotu-hotu tenke iha responsabilidade atu bele kontribui ba seguransa nasionál no internal sira-ne’e hodi ita-nia rai ne’e bele hakmatek”, nia fó hanoin.
Iha fatin hanesan, Prezidente Konsellu Veteranu munisípiu Viqueque, Adriano Camara ‘Lentil’, husu ba inan-aman sira atu kontrola nia-oan sira hodi labele komete iha konflitu ka krime atu kontribui ba pás no estabilidade.
“Konflitu ne’e afeta ba dezenvolvimentu iha nia postu ne’e. Nune’e husu ba joven sira atu hakribi violensia hodi kontribui ba pás no estabilidade iha rai laran,” nia sujere.
Administradór Postu Uatucarbau, Anacleto Doutel Sarmento, husu agradese ba PNTL munisípiu Viqueque ne’ebé inisiativa organiza atividade diálogu ida-ne’e hodi troka hanoin atu ba futuru labele iha krime ka konflitu ne’ebé akontese iha postu referidu.
“Ho presensa PNTL nian ita bele fó solusaun ba ita-nia komunidade sira no juventude sira-ne’ebé hamosu hela problema bei-beik. Tanba ne’e, ita hamutuk hodi redus konflitu hodi kontirbui ba pás no estabilidade,” nia afirma.
Entretantu, Abitante Uatucarbau, Ana Cebastiana da Costa Freitas, husu autoridade seguransa liuliu PNTL bainhira halo atuasaun ba konflitu ruma tenke servisu ho neutralidade labele defende parte balun.
“Diálogu ne’e importante ba ami komunidade sira hodi redús problema, maibé ami mós hakarak fó hanoin ba parte seguransa sira bainhira mosu problema ruma halo atuasaun karik,tenke hatudu ita-nia neutru”, nia sujere.
Notisia relevante: PNTL Viqueque apela ba joven atu prevene-an hosi konflitu
Jornalista: Vitorino Lopes da Costa
Editór : Florencio Miranda Ximenes
