DILI, 24 abríl 2024 (TATOLI)–Konsellu Ministru (KM) aprova projetu dekretu-lei alterasaun dahuluk ba rejime espesiál aprovi ionamentu kona-ba vizita Sua Santidade Papa no ezekusaun Orsamentu Jerál Estadu (OJE) tinan 2024 nian, ne’ebé aprezenta husi Ministru Administrasaun Estatál, Tomás do Rosário Cabral.
“Projetu dekretu-lei ida-ne’e ho objetivu atu ajusta prosedimentu legál sira ne’ebé vijente atu garante preparasaun ida-ne’ebé efisiente no lais kona-ba vizita Papa nian mai Timor-Leste, ne’ebé konfirma ona ba loron 09 to’o loron 11 setembru 2024,” Ministru Prezidénsia Konsellu Ministru ein ezersísiu, Adérito Hugo da Costa, relata hafoin reuniaun ezekutivu, iha Palásiu Governu, kuarta ne’e.
Nia dehan, kuadru legál atuál aprezenta formalidade ne’ebé la tuir ho urjénsia preparativu no presiza flesibilidade administrativa ida hodi hasoru situasaun estraordinária ida-ne’e.
Notísia relevante : Governu autoriza despeza to’o millaun $12 ba preparasaun vizita Papa Francisco
Tanba ne’e, propoin atu simplifika prosesu aprovizionamentu nian, ho adosaun medida sira ne’ebé garante ajilidade iha prosesu no esklarese regra ezekusaun despeza nian hodi permite sirkulasaun ne’ebé adekuada ba rekursu entre entidade sira ne’ebé envolve iha organizasaun vizita Amu Papa nian.
“Projetu ida-ne’e ho objetivu atu asegura katak Timor-Leste bele organiza eventu ida-ne’ebé ho magnitude boot no importánsia internasionál ho efikásia, efisiénsia no seleridade ne’ebé presiza,” nia tenik.
Jornalista : Antónia Gusmão
Editora : Julia Chatarina
