COVALIMA, 24 Abríl 2024 (TATOLI) – Servisu Munisipál Aprovizionamentu Covalima (SMAC) loke oportunidade ba empreza lokál sira atu submete dokumentu ba prosesu pré-kualifikasaun hodi bele partisipa iha konkursu públiku ba projetu Planu Dezenvolvimentu Integradu Munisipál (PDIM) hamutuk ualu.
Diretór Servisu Munisipál Aprovizionamentu Covalima, Roberto Alvaro Gomes, esplika katak submisaun dokumentu ba pré-kualifikasaun ne’e bazeia ba orientasaun husi Prezidente Autoridade Covalima (PAM), Miguel Armada Cardoso.
Dirijente ne’e esplika katak rejime aprovizionamentu PDIM anunsia konkursu pré-kualifikasaun munisipál bazeia ba artigu 17 husi Diploma Ministeriál númeru 19/2013, 16 Outubru, kona-ba regulamentu rejime aprovizionamentu PDIM hodi konvida empreza lokál, ne’ebé nia sede iha Covalima atu submete dokumentu.
Obejivu husi prosesu pré-kualifikasaun mak atu avalia no kualifika empreza lokál bele partisipa iha konkursu públiku munisipál hodi adjudika obra publika iha munisípiu ne’ebé empreza nia sede estabelese ho nia kategoria A konkorre ba projetu ho valór rihun $150 no empreza pré-kualifikada kategória B konkorre ba projetu ho montante entre rihun $150 no $500.
Empreza sira aprezenta dokumentu komprovativu no bainhira iha pedidu husi Servisu Munisipál Aprovizionamentu ho tipu konstrusaun sivíl mak sei halo konstrusaun ba estrada, ba edifísiu no halo kanalizasaun ba sistema bee-moos.
“Tuir loloos ita hala’o ona, tanba iha problema tékniku ho dokumentu ne’ebé prepara laiha asinatura husi estrutura anteriór, nune’e prosesu tomak para iha Marsu 2023. Tanba ne’e, tuir kompeténsia PAM [atuál] hakarak halo pré-kualifikasaun ba projetu PDIM”, Roberto Alvaro Gomes dehan, ohin.
Diretór Servisu PDIM, Carlito Barros Reis, reforsa katak implementasaun projetu ualu ne’e nia prosesu to’o ona iha aprovizionamentu no iha Maiu bele hahú ona.
Iha 2024, implementa projetu PDIM ualu ne’e nia orsamentu hamutuk millaun $1,4. Tipu projetu ne’e mak hanesan konstrusaun muru haleu Servisu Munisipál Obra Públika no Transporte ho osan $83.440,47, harii rezidénsia ba médiku iha suku Holpilat $473.657,35, konstrusaun salaun enkontru Postu Administrativu Fohorem $132.923,43, rekonstrusaun fatin turizmu iha Lakirin, iha suku Holpilat, postu Maucatar $155.798,80.
Aleinde ne’e, harii laboratóriu Sentru Saúde Komunitáriu Zumalai, iha suku Zulo $87.022,60, harii Eskola Bázika Filiál iha suku Matai, postu Maucatar ho verba $87.931,39, konstrusaun kanál irrigasaun Bauraikun iha aldeia Kulu-oan, iha suku Tashilin, postu Zumalai ho osan $192.141 no harii merkadu iha suku Camnasa, postu Suai ho osan $137.278,18.
Notísia relevante: Autoridade Covalima sensibiliza matadalan ba elaborasaun PDIM
Jornalista: Celestina Teles
Editóra:Maria Auxiliadora
