OÉ-CUSSE, 24 Abríl 2024 (TATOLI) – Polísia Nasionál Timor-Leste (PNTL), liuhusi Unidade Patrullamentu Fronteira (UPF), lideradu husi Superintendente Polísia Euclides Belo, no Komandante Satuan Tugas Penyamanan Perbatasan (Satgas-Pamtas), Tentara Nasional Indonesia (TNI) Sektor Barat, Letnan Kolonel Ronald Tampubolon, organiza patrullla konjunta hodi koorndena ho pilár sira iha liña fronteira Haumen-Ana, sub-rejiaun Pássabe, Rejiaun Administrativa Espesiál Oé-Cusse Ambeno (RAEOA).
“Obejtivu husi patrullamentu koordenadu ne’e atu identifika no observa direita pilár sira iha liña fronteira no halo mós divulgasaun [informasaun] ba komunidade no autoridade lokál husi parte Indonézia no Timor-Leste kona-ba seguransa iha liña fronteira”, Komandante UPF, Superintendente Polísia Euclides Belo, informa.
Nia fundamenta katak liuhusi atividade konjunta ne’e bele mós hametin lasu amizade hodi garante seguransa entre TNI no UPF, nune’e bele fó esperansa ba komunidade iha liña fronteira atu fiar nafatin ba forsa sira.
Notísia relevante: RAEOA sei koordena Governu Sentrál ativa hikas bazár populár fronteira Pássabe
“TNI kada tinan sempre troka malu, tanba ne’e, hanesan kultura ida ami ho Satgas mai hala’o misaun iha liña fronteira. Tenke halo patrullamentu koordenadu konjuntu atu ita bele koñese di’ak liután ita-nia liña fronteira nasaun rua nian, katak soberania idak-idak nian. Objetivu seluk mak liuhusi patrullamentu ne’e bele kombate tranzasaun ilegál iha liña fronteira”, esplika.
Patrullamentu konjuntu ne’e kobre pilár haat ho nia distánsia kilómetru neen, ne’ebé lidera direita husi komandante Satgas TNI ho komandante UPF rasik. “Ami na’in-rua komandante Satgas Sektor Barat mak lidera. La’ós tuur de’it iha edifisíu, maibé husi inisíu mai to’o Mota Baen, hamrook, hamlaha, maibé ida-ne’e la’ós sai obstáklu ba ami, tanba ne’e misaun ami-nian, tenke koordena ho parsériu sira”, katak.
FOTO ATUÁL: UPF ho TNI idaidak ho nia Bandeira nasaun nian iha fronteira
Iha fatin hanesan, Komandante Satgas Sektor Barat, Letnan Kolonel Ronald Tampubolon, espera katak liuhusi atividade ne’e atu haree direta pilár sira ne’ebé iha liña fronteira Haumen-Ana.
“Distánsia ne’ebé ohin ita patrulla hamutuk ho UPF kilómetru neen no pilár haat mak ita identifika hanesan pilár númeru 56, 55, 54 no pilár ikus iha númeru 50. Ida-ne’e mak ikus husi patrullamentu koordenasaun”, dehan.
Nia salienta katak responsabilidade UPF no TNI ba pilár sira iha Sektor Barat hahú husi fronteira Wini-Sakato to’o Naktuka-Oépoli hamutuk 585, husi númeru ne’e, 19 iha fronteira Haumen-Ana.
“Ha’u orgullu tanba durante ne’e ami serbisu hamutuk ho UPF ne’ebé lidera husi Superintendente Euclides Belo, ami iha kooperasaun di’ak durante fulan neen. Ami koloka iha ne’e haree malu di’ak atu observa ita-nia fronteira. Ida-ne’e hatudu amizade mai ita, karik iha falla ruma ita-bele rezolve ho di’ak no transparánsia, nune’e kontribui ba pás iha liña fronteira”, nia konklui.
Notísia relevante: RAEOA aloka rihun $510-resin harii postu integradu Oésilo
Jornalista: Abílio Elo Nini
Editora: Maria Auxiliadora
