DILI, 24 abríl 2024 (TATOLI)–Vise-Reitór Asuntu Akadémiku no Garantia Kualidade (VRAAGQ, sigla portugés) Universidade Naciona; Timor Lorosa´e (UNTL), Samuel Venâncio de Sousa Freitas, husu ba estudante UNTL ne´ebé la-ativu atu halo re-inskrisaun.
Notisia Relevante: Estudante 264 ne’ebé ameasadu deziste hosi UNTL halo ona reinskrisaun
Nia hateten, atu kumpre promesa sira-neʼebé fő-sai ona kona-ba rejime preskrisaun iha tinan 2024, mak UNTL sei ba aplika rejime preskrisaun no tuirmai eliminasaun ba dadus sira-neʼebé la-regularizadu liuliu ba estudante la-ativu sira-ne’ebé UNTL simu husi tinan 2000 to’o 2012, ne’ebe ho totál hamutuk 9.255.
“UNTL deside hodi hanaruk periodu ba regularizasaun matrikula ba estudante la-ativu sira husi periodu tinan 2000 to’o 2012 hamutuk 9.255 ne´e ba periodu fulan-neen tan, ne´ebé hahú abríl iha data ohin to´o 30 outubru 2024. Hafoin ida-ne’e, dadus sira-ne’ebé la-regularizadu sei hasai ka elimina ofisialmente husi Sistema Informasaun Rejistu Akadémiku (SIRA),” Vise Reitór Asuntu Akadémika no Garantia Kualidade ne´e hateten liuhosi kongerénsia imprensa iha salaun UNTL, Caicoli, kuarta ne´e.
Nia hateten, ida-ne’e aprezenta orientasaun ne’ebé presiza hodi regula matrikula no eliminasaun ba dadus la-regularizadu sira, no bainhira la tuir re-inskrisaun mak estudante la-ativu sira ba periodu tinan 2000-2012 sei elimina kedas husi Sistema SIRA hahú husi loron 01 fulan-novembru tinan 2024,
Totál estudante la-ativu hamutuk 9.223 ne´e fahe ba Fakuldade 10 iha UNTL hanesan Fakuldade Edukasaun 1.328, Enjinária, Siénsia no Teknolojia hamutuk 1.160, Fakuldade Edukasaun Arte no Umanidade 2.796, Fakuldade Medisina no Siénsia Saúde hamutuk 72, Fakuldade Jestaun Ekonómia hamutuk 1.571, Ciências Sociais 1.926, Direito 197, Ciências Exatas 0, Filosofia 15, Turismo, Artes e Indústrias Criativas e Culturais 190.
Regulamentu akadémika UNTL nian regula rejime preskrisaun, iha artigu 10, maibe kestaun ida-ne’e seidauk aplika dezde tinan akadémiku 2013 hodi rezolve dezafiu sira kona-ba matrikula ka iha preskrisaun liuliu ba estudante la-ativu sira.
Reitór UNTL, João Martins, hatutan ba estudante sira-ne’ebé la-ativu ne´e sei la hetan sansaun maibé selu hosi nia la-ativu to’o ativa fali iha UNTL.
“Ita mantein ita-nia estatutu entun sira mós iha obrigasaun no dever atu bele selu propinas fali tempu ne’ebé sira lakon. Agora kona-ba tékniku bainhira estudante mai mak parte estudante akadémika sei haree asuntu ne’e, ida-ne’e ita halo case by case, labele trata jerál,” nia dehan.
Ba estudante UNTL la-ativu neʼebé UNTL simu iha periodu 2000 to’o 2012 ne´e, nia prosesu regularizasaun matrikula sei responsabiliza husi Vise-Reitór Asuntu Akadémiku no Garantia Kualidade (VRAAGQ), Samuel Venâncio de Sousa Freitas.
Tanba ne’e, pedidu ba readmisaun tenke submete iha sekretariadu VRAAGQ entre fulan-abril no fulan-outubru tinan 2024, no sekretariadu VRAAGO sei servisu hamutuk ho Departamentu Akadémiku no Fakuldade.
Regularizasaun Matrikula iha UNTL sei hala’o liuhusi prosesu readmisaun (simu fila-fali) ne’ebe regula iha artigu 8 regulamentu akadémiku UNTL nian.
Hanesan akontese ona iha prosesu normál admisaun nian, pedidu readmisaun tenke akompaña ho billete identidade, komprovativu ikus inskrisaun nian iha UNTL no selu propina no kópia transkrisaun notas.
Iha fulan-agostu tinan 2022, UNTL liuhusi Ofisiu Sirkulár Reitór nian Nú. 006/UNTL/R/VIII/2022, ho data loron-8 fulan-Agostu tinan 2022, kona-ba Orientasaun Jerål sira hodi implementa Rejime Preskrisaun nian iha UNTL deside hodi fö tempu fulan 18 hodi regula matrikula ba estudante la-ativu sira liuhusi prosesu readmisaun,
Iha biban ne´eba, tempu regularizasaun matrikula nian sei termina iha loron-29 fulan-fevereiru tinan 2024, ne’ebé Diresaun Nasional ba Atendimentu Estudante (DNAE) konsege rejista ona la-liuhusi pedidu readmisaun ba estudante la-ativu hamutuk 410, korresponde ba 1.60% husi totál estudante la-ativu UNTL nian.
Antes ne´e, to’o 04 fulan-setembru tinan 2023, Sistema Informasaun Rejistu Akadémiku (SIRA) hatudu totál husi estudante rejistadu hamutuk 47771 no entre sira-ne’e ema na in-25021 mak la-ativu ekivalente ho 52,4%. Sura ho simu estudante-foun UNTL nian iha tinan 2024 hamutuk ema na’in-3.487 mak totál estudante UNTL nian aumenta hamutuk ema na in-51.258.
Jornalista : Osória Marques
Editór : Cancio Ximenes
