DILI, 25 abril 2024 (TATOLI) – Padre Pároku Igreja Katedrál de Dili, Paulos Maia, hateten, empreza PT. Bakti Timor Karya (BTK) hala’o hela reabilitasaun ba Katedrál Dili atu prepara simu vizita Papa nian fulan-setembru 2024.
Nia relata reabilitasaun ba obra hala’o hosi kompaña BTK Indonézia durante fulan neen, tanba presiza fulan-ida atu purifika.
“Obra reabilitasaun ne’e hahú ona iha fulan-fevereiru no sei termina iha fulan-jullu. Entaun, depois reabilitasaun ne’e sei iha fulan-ida ita atu halo limpeza ba preparasaun no bu’at ne’e sira hotu, tanba reabilitasaun ne’e dois, ho ida-ne’e mak ita presiza fulan-ida atu purifika”, Padre Pároku Igreja Katedral de Dili, Paulos Maia, ba TATOLI, iha Katedral.
Saserdote ne’e hateten, reabilitasaun ba igreja ne’e jerál; ba edifísiu tomak, hodi bele simu amu Papa nia vizita.
“Antes ne’e dioseze Dili iha planu ona atu halo reabilitasaun ba Katedrál, koinside ho vizita Papa nian, Governu mós interven finanseira. Kona-ba vizita amu papa nian, tuir informasaun provavelmente, Papa sei vizita Katedral hodi halo enkontru ho relijiozu no relijioza sira,” nia dehan.
Iha fatin hanesan, Supervizór kompaña BTK, Suwarno Warno, informa, empreza halo reabilitasaun igreja ne’e einjerál hanesan pinta foun edifísiu, janela, plafon, telladu no sei pinta mós morru hale’u igreja.
Responável ne’e mós informa katak obra reabilitasaun atinje ona 70% tanba parte telladu no prediu komesa pinta, plafon sobu hotu ona.
“Ita komesa pinta prédiu no kalen ona no sei pinta tan janela no odamatan”, Supervizór kompaña BTK, Suwarno Warno, ba Tatoli, iha Katedral Vila Verde.
Nia garante obra reabilitasaun sei termina tuir tempu. “Ita garante hotu iha jullu. Ita iha kontratu to’o fulan-jullu”.
Notísia relevante:Papa Francisco sei vizita fatin importante iha Dili
Jornalista: Jesuína Xavier
Editór: Rafael Ximenes de A. Belo
