DILI, 30 abril 2024 (TATOLI)–Papa Francisco sei hala’o vizita pastorál no vizita Estadu iha Timor-Leste durante loron tolu (3), ne´ebé hahú iha loron 09 setembru no ramata iha 11 setembru 2024 ne’e, sei vizita fatin importante sira iha Dili.
Notísia Relevante: Papa Francisco sei vizita Timor-Leste iha 09-11 setembru 2024
“Vizita Papa Francisco nian ne’e mós mai hanesan na’in-ulun kreda nian hodi vizita nia povu no sarani sira, nune’e mós hanesan xefe Estadu Vatikanu nian, entaun nia mai vizita Timor hanesan Estadu mós,” Vise Koordenadór ba Vizita papa husi Igreja no atuál Pároku Igreja Motael, Guilhermino da Silva, hatete ba Tatoli iha nia Rezidénsia parokiál, Motael, tersa ne´e.
Tuir delegasaun Vatikanu nian ne’ebé mai iha fulan-janeiru ne´e, nia dehan, fatin sira-ne’ebé mak Papa tenke Vizita ne’e mak preparasaun halo ona hanesan iha aeroporto Internasionál Prezidente Nicolau Lobato Dili, Palásiu Prezidente Nicolau Lobato nian, Sentru Konvensau Dili (CCD), Katedrál Dili no ikus liu selebrasaun misa iha Tasi-tolu no inklui koventu Asosiasi Lembaga Misonaris Alam (ALMA) ida iha Dili.
Maske seidauk hatene loloos kalendáriu atu halo vizita ba fatin importante sira-ne´e, maibé Papa Francisco sei hala’ o nia vizita Estadu hodi hasoru malu ho Xefe Estadu Timor-Leste, José Ramos Horta, iha Palásiu Prezidensiál Nicolau Lobato, Bairru Pite, Dili.
Palásiu Prezidensiál Nicolau Lobato, Bairru Pité, Dili. Imajen/Espesiál.Durante loron tolu iha Timor-Leste, Papa Francisco sei hala’o vizita pastorál hodi hasoru malu ho relijiozu no relijioza sira husi Dioseze Dili, Baucau no Maliana, ne´ebé sei realiza iha Igreja Katedrál Imaculada Conceição Vila Verde, Dili.
Papa Francisco mós sei hasoru malu ho reprezentante juventude sira husi parokia hotu-hotu iha Dioseze Dili, Baucau no Maliana, ne´ebé sei realiza iha Sentru Konvensaun Dili (CCD, sigla portugés), Merkadu Lama, Dili.
Iha enkontru entre relijiozu no relijioza sira no reprezentante juventude ka juventude Katólika sira-ne´e, Papa Francisco sei ko´alia kona-bá fé sarani sira-nian no kultura tuir tradisaun no toman timoroan sira-nian ho tema “A Vossa fé seja a vossa Cultura”.
Aleinde ne´e, Papa Francisco sei vizita igreja ka parokia tuan liu iha Timor-Leste mak Igreja Santo António Motael, iha Motael, Dili.
Notísia Relevante: Preparasaun simu Papa Francisco: Empreza Eureka Gagas Utama reabilita igreja Motael
Iha vizita pastorál ne´e, Papa Francisco sei vizita konventu Asosiasi Lembaga Misonaris Alam (ALMA) ne´ebé durante ne´e hala’o nia misaun hodi hamatan ba labarik oan-ki´ak sira no halo tratamentu saúde ba labarik sira-ne´ebé hetan moras autizmu, iha Pantai Kelapa, Dili.
Ikus liu, Papa Francisco sei hala’o vizita no sei hakotu ninia vizita pastorál ne´e hodi prezide misa solene iha fatin istóriku no sítiu turistíku relijiozu iha Tasi-tolu. Iha Tasi-tolu, iha tempu okupasaun Indonézia, Papa João Paulo II hala’o vizita pastorál mai Timor-Leste no prezide misa solene iha Tasi-tolu, iha 12 outubru 1989.
Notísia Relevante: IgrejaTimor hili tema “A vossa fé seja a vossa Cultura” durante vizita Amu Papa
Jornalista : Jesuína Xavier
Editór : Cancio Ximenes