DILI, 25 abril 2024 (TATOLI)–Diretór Jerál Servisu Kooperarativu Ministériu Saúde (MS), Marcelo Amaral, hateten profisionál saúde na’in-haat ne´ebé serbisu iha Servisu Hapara Fuma (SHF) iha Sentru Saúde Formosa ne´e Ministériu Saúde kontinua estende sira-nia kontratu no garante sira-nia saláriu.
Marcelo Amaral esplika, MS hein hela pedidu hosi Sentru Saúde Formosa, tanba sira haree hela termu referénsia loloos atu bele asina kontratu.
Pesoál saúde na’in-haat (4) inklui iha prosesu mapeamentu MS nian, tanba ne’e sira kontinua serbisu maibé MS sei halo pagamentu.
“Importante mak sira iha relatóriu serbisu no sira nafatin iha lista prezensa loro-loron. Prosesu ne’e la’o hela tanba iha mós ajustamente ba mapeamentu pesoál MS nian,” Diretór Jerál Servisu Kooperativu iha MS, Marcelo Amaral, hateten ba Agência Tatoli, liuhosi telefónika.
Responsável Sentru Hapara Fuma Médiku Jerál, Eldino de Castro Rangel, hateten pesoál na’in-haat (4) ba atendimentu ema fumadór sira iha SHF kontinua servisu voluntariamente, tanba seidauk hetan asina kontratu ba sira-nia serbisu.
Pesoál saúde sira termina sira-nia kontratu iha dezembru tinan 2023 no agora hala’o hela serbisu atendimentu iha SHF.
“Pesoál saúde sira-ne’ebé serbisu Servisu Hapara Fuma, MS seidauk estende sira-nia kontratu,” , Médiku Jerál, Eldino de Castro Rangel, hateten ba Agência Tatoli, liuhosi WhatsApp (WA).
Nia relata, iha fulan hirak ne’e pesoál sira serbisu sein iha saláriu mensál no halo atendimentu voluntáriu, tanba ema fumadór sira kontinua ba halo akonselamentu hodi bele hapara fuma.
SHF halo ona atendimentu ba tabajismu hamutuk 1283 no no lori ema liu 900 mak hapara fuma sigaru.
Jornalista : Jesuína Xavier
Editór : Cancio Ximenes
