DILI, 24 abríl 2024 (TATOLI) – Tribunál Ekleziástiku Arkedioseze Metropolitana Dili anula kazamentu matrimóniu hamutuk 44 iha tinan 2023 husi totál kazu 55.
Madre Sabina Martins Mota, servisu iha prosesu iha Tribunál Ekleziástiku, hateten, Tribunál konsege rezolve kazu anulasaun matrimóniu ba ema sira ne’ebé ba aprezenta iha Tribunál Ekleziástiku Dioseze Dili nian.
“Iha Tinan 2023, ami rezolve ka anula kazu 44 ba matrimóniu ka anula matriomóniu ba família hamutuk 44 iha Tribunál Ekleziastiku Dioseze Dili nian”, Madre Sabina Martins Mota hato’o ba TATOLI, iha sede episkopál, iha Lecidere, kuarta ne’e.
Relijoza ne’e mós relata, iha tinan ida-ne’e, Tribunál mós rejista 20 kazu ho problema matrimoniál ne’ebé konsege mós anula matrimóniu família 11 nian.
Nia hateten, husi problema ba kazu anulasaun matrimóniu ne’e iha mós kazu haat mak rekursu ba Tribunál.
“Família hamutuk haat mak halo rekursu no amu kanonista sira rezolve tuir dalan direitu kanóniku ninian. Família rua aprezenta rekursu iha 2022; ida iha 2023 no ida iha 2024. Totál kazu rekursu ka reklamasaun ne’e amu sira konsege rezolve ho di’ak”, nia hateten.
Sabina Martins Mota dehan, iha anulasaun matrimóniu ne’e, tanba feto ka mane kazál sira iha kazamentu ba daruak, entaun sira ba aprezenta iha Tribunál Ekleziástiku.
“Kazál sira ba hetan feto no mane seluk, sira labele hetan komuñaun. Tanba ne’e, sira mai halo tuir prosesu ida-ne’e atu bele hetan komunga no konfesa iha kreda ba klamar nian. Ida-ne’e mak sira-nia hakarak”, nia esplika.
Madre informa, aprezentasaun kazu ba nulidade kazamentu ka matrimóniu iha númeru ne’ebé hanesan entre feto no mane.
Nulidade ne’e Tribunál Ekleziástiku bazea ba Kódigu Direitu Kanóniku (CDC, sigla portugés) artigu 1073o ne’ebé deskreve impedimentu ne’e definitivamente ba ema ne’ebé inkapaz atu kontrai validamente matrimóniu.
Iha artigu 1074 o CDC nian mós hakerek tan, konsidera ba impedimentu públiku nian ne’ebé bele prova iha forum ka reuniaun externu, iha kazu kontráriu, subar ka okultu.
Jornalista: Jesuína Xavier
Editor: Cancio Ximenes
