DNTT resjista veíkulu importasaun 7.687 husi janeiru-marsu 2024
DILI, 26 abríl 2024 (TATOLI)—Ministériu Transporte no Komunikasaun (MTK) liuhusi Diresaun Nasionál Transporte Terrestre (DNTT) rejista transporte importasaun hamutuk 7.687, hahú husi janeiru to’o marsu tinan ne’e.
“Veíkulu sira kompostu husi karreta 1.351, motór 6.232, no trisiklu (tum-tum) 104,” Xefe Departamentu Sekretariadu Apoiu Tékniku Administrasaun DNTT, Nelson Sequeira Martins, informa ba Agência Tatoli, iha ninia knaar-fatin, DNTT, Balide, sesta ne’e.
DNTT rekolla reseita hamutuk $1.318.166,50 ba kofre Estadu iha trimestre dahuluk tinan ne’e.
“Ita la tau reseita ketak, maibé akumula ona ho reseita rejistu veíkulu hamutuk $631.599,50, ita rekolla reseita ba item seluk hanesan ba inspesaun $72.357, transporte públiku $42.575, karta kondusaun $131.950, inspesaun veíkulu $417.890, guia da marsa $11.305, livreti provizóriu $1.190, no xapa espesiál $9.300,” nia informa.
Notísia relevante : DNTT husu ba motorista sira foti xapa matríkula orijinál
DNTT iha tinan 2023 rejista veíkulu 86.823, kompostu husi karreta silindru, loader, kamiaun no seluk tan hamutuk 28.587, enkuantu motór hamutuk 58.236.
Reseita akumuladu husi veíkulu importasaun $2.160.287, transporte públiku $140.838, karta kondusaun $491.299 no inspesaun veíkulu $1.387.946, nune’e totál reseita $4.180.371
Aleinde ne’e, DNTT mós rejista transporte públiku neʼebé tama no sai hosi Fronteira Batugade iha tinan 2023 nia laran, ne’ebé karreta husi Indonézia mai Timor-Leste 7.408, Timor-Leste bá Indonézia 4.817, no Dili bá Rejiaun Administrativa Espesiál Oé-cusse Ambeno (RAEOA) liu Batugade 3.228, ne’ebé husi númeru ne’e karreta Governu hamutuk 258.
Jornalista : Arminda Fonseca
Editora : Julia Chatarina
