Funsionáriu 100 husi MAPPF transfere ba Ministériu Edukasaun

DILI, 26 Abríl 2024 (TATOLI) – Funsionáriu 100 husi Ministériu Agrikultura, Pekuária, Peska no Floresta (MAPPF) ne’ebé durante ne’e hanorin iha Eskola Téknika Agríkola Maliana-Korluli, Manatuto-Natarbora, Fuiluro-Lautém no Oé-Cusse transfere ona ba Ministériu Edukasaun (ME), tanba eskola haat ne’e tutela fali ona ba ministériu ne’e.

Diretór Rekursu Umanu MAPPF, Hipólito da Costa, informa katak formadór husi eskola téknika agríkola haat ne’e loloos hamutuk 127, maibé 27 deside mantein iha MAPPF no seluk ne’e mak muda ba ME iha Janeiru 2024.

“Funsionáriu hamutuk 127 mak apoia prosesu aprendizajen iha eskola téknika agríkola haat, tanba antes ne’e iha responsabilidade Ministériu Agrikultura nian, maibé mosu desizaun husi Governu, entaun eskola ne’e entrega fali ba ministériu Edukasaun hodi jere. Bainhira transfere ona ba ME, buat hotu-hotu tama ona ba responsabilidade Ministériu Edukasaun nian, inklui saláriu funsionáriu na’in-100 nian”, dirijente ne’e dehan iha Comoro, ohin

Kona-ba formadór 27 husi MAPPF ne’e kontinua apoia formasaun téknika ba iha sentru Korluli no Natarbora ne’ebé tuir planu sei hahú atividade iha tinan ne’e hodi kapasita jerasaun foun sira atu prepara-aan ba futuru hodi kompete iha merkadu no sentru rua seluk sei reativa iha tinan oin.

Iha sorin seluk, Xefe Departamentu Jestaun Sentru Formasaun Profisionál Agríkola, Óscar Paulino, relata katak manorin na’in-27 husi MAPPF ne’e, iha sentru Korlui Maliana na’in-lima – permanente ida no kazuál haat. Depois husi Natarbora iha 14 – permanente neen, ajente lima, no kazuál tolu.

Responsavel ne’e salienta katak iha mós formadór suplente iha nasionál hamutuk na’in-ualu –  permanente hitu no ajente ida.

Rekorde katak, sentru formasaun téknika agríkola Kurluli no Natarbora dezde nia ezisténsia iha 2020 forma ona joven hamutuk 240.

Notísia relevante: Sentru formasaun agríkola rua sei funsiona hikas hodi forma joven sira

Jornalista: Tomé Amado  

Editora: Maria Auxiliadora