BOBONARO, 26 abríl 2024 (TATOLI)-Tuir dadus ne’ebé tekniku Diresaun Servisu Munisipál Agrikultura, rekolla hare époka dahuluk tinan 2024 iha munisípiu Bobonaro kuda iha natar hamutuk ekatare 3,504,9 ne’ebé kobre postu administrativu neen.
Dadus ne’e fó-sai hosi Diretór Servisu Munisipál Agrikultura, munisípiu Bobonaro, Longuinhos João, durante halo enkontru ho Prezidente Autoridade Munisipál Bobonaro, Alexandrino Pires, iha sentru Agrikultura, Tunubibi, kuarta ne’e.
Notísia relevante: Natar ektare rihun 13-resin iha Maliana abandona
“Hare iha primeira époka ne’e ita konsege kuda ona ba natar ho nia luan ektare 3,504,9, ne’e iha postu hirak-ne’e hotu, inklui Bobonaro maske oituan maibé nia númeru ne’e iha hotu,” Diretór Longuinhos hateten.
Diretór Longuinhos informa, iha époka dahuluk ne’e mos agrikultór barak abandona natar, tanba mudansa klimátika.
“Nia afeta kedas ba iha époka kultiva ka kalendáriu kultivasaun ne’e, tanba ne’e mak ita haree iha natar balu kuaze abandonadu, tanba mos problema irrigasaun, depois peste mos ataka hela natar,” nia esplika.
Enkuantu ba époka daruak nia agrikultór sira iha parte Bilimau-Marco postu Cailaco no Loes, ba postu administrativu Atabae hahú ona halai natar.
Alende ne’e iha natar ekatare 200 ne’ebé agrikultór sira kuda liu hosi programa Prátika Agrikultura Diak (PAD) iha suku lima ne’ebé pertense ba postu administrativu Maliana, hanesan Ritabou, Raifun, Lahomea, Odomau, Holsa no Tapo-Memo.
“Ida ne’e ita fó ba grupu sira ne’ebé atu sai modelu atubele atrai ka influénsia fali agrikultór sira seluk, grupu sira-ne’e asesu hotu fini, adubu orgániku, pestisida no apoia tékniku husi Estensionista sira,” nia katak.
Alende ne’e rezultadu produsaun Batar époka 2023-2024 iha Bobonaro kada ekatare atinje toneleda 2,2 .
“Batar ne’ebé kuda iha tinan 2023 nia rohan no kolleta iha 2024 ne’e kuda iha to’os ekatare 4,922,3 ho ninia produtividade kada ekatare ne’e, ami foti media rata-rata deit, iha kilograma 2,200 ka 2,2 toneleda kada ekatare,” nia akresenta.
Enkuantu totál natar iha Bobonaro kuaze ekatare rihun ualu-resin, husi númeru ne’e natar iha área Bilimau, postu administrativu Cailaco hamutuk ekatare 300-resin mak mota sobu ona.
Notísia relevante: PA Bobonaro preokupa komunidade halo uma iha natar Maliana
Jornalista: Sérgio da Cruz
Editór: Evaristo Soares Martins
