PN sei haruka alterasaun lei CAC ba PR
DILI, 26 abríl 2024 (TATOLI)—Prezidente Parlamentu Nasionál (PPN), Maria Fernanda Lay, sei haruka alterasaun daruak husi lei númeru 8/2009, loron 15 jullu, Komisaun Antí-Korrupsaun (CAC, siglá portugés), ba Prezidente Repúblika (PR) iha semana oin hodi bele promulga.
Notísia Relevante: Komisaun A finaliza redasaun finál alterasaun lei CAC haruka ba PR
“Agora Prezidente Repúblika laiha ne’e, ne’ebé hein iha segunda-feira bele haruka ona (alterasaun lei CAC) hodi bele promulga,” Prezidente Parlamentu Nasionál ne´e hateten hodi responde Agência Tatoli iha resintu Parlamentu, sesta ne’e.
Iha 22 abríl 2024, Parlamentu Nasionál liuhusi reuniaun plenária, aprova alterasaun daruak husi lei númeru 8/2009, loron 15 jullu, Komisaun Antí-Korrupsaun (CAC, siglá portugés) iha finál globál ho votu afavór 37, kontra 0 no abstensaun 0.
Antes tama ba votasaun finál globál, deputadu sira halo uluk diskusaun no votasaun ba alterasaun lei CAC iha faze jeneralidade ne’ebé aprova ho rezultadu votu hanesan, hodi kontinua kedas ba faze espesialidade ne’ebé aprova kada artigu.
Tuir testu orijinál ne’ebé Governu aprezenta ba alterasaun husi lei númeru 8/2009, loron 15 jullu, hanesan iha artigu 7 númeru 1, katak komisáriu designa husi PN liuhusi proposta Governu, ho maiória absoluta husi deputadu no toma pose husi PPN.
Artigu 11 iha alinea g kona-ba ezonerasaun, aprova husi maiória absoluta husi deputadu liuhusi razaun fundamentu husi Primeiru-Ministru, iha kazu violasaun obrigasaun husi komisáriu dekorente iha lei.
Iha númeru 9, iha kazu sesaun mandatu ho termu, maske komisáriu mantein ninia funsaun to’o pose titulár foun.
Iha diskusaun espesialidade ne’e deputadu sira aprezenta proposta alterasaun ida ba artigu 11 husi testu orijinál ba proposta alterasaun ne’e hodi armoniza liafuan balun.
Nune’e, ho aprovasaun ne’e, PPN husu Komisaun A ne’ebé trata asuntu Justisa no Konstituisionál atu halo nia redasaun finál, hafoin envia ba Prezidente Repúblika ne’ebé iha kompeténsia eskluziva atu promulga.
Tanba ne’e, iha 24 abríl liu bá Komisaun A finaliza ona redasaun finál.
Entretantu, bankada opozisaun FRETILIN no PLP la partisipa iha diskusaun no votasaun alterasaun lei CAC.
Antes ne’e, Komisáriu CAC sesante, Sérgio Hornai da Costa, ninia mandatu ramata iha loron 21 janeiru 2023, ne’ebé to’o agora seidauk iha naran foun okupa kargu ne’e tanba laiha konsensu entre Deputadu bankada Governu no opozisaun.
Liuhusi reuniaun líder bankada PN, konsege halo ona ajenda dala-neen hodi diskute kona-ba naran Komisáriu ne’ebé Governu propoin ona, maibé tanba razaun téknika ka kórum la to’o maka la konsege realiza to’o agora.
Iha loron 19 fevereiru, Governu haruka ona naran Rui Pereira dos Santos, nu’udar kandidatu úniku ba Komisáriu CAC.
Jornalista : Nelson de Sousa
Editór : Cancio Ximenes
