PNTL Viqueque la tolera komunidade perturba eleisaun suku iha Builo
VIQUEQUE, 26 abríl 2024 (TATOLI)— Polísia Nasionál Timor Leste (PNTL) la tolera aktu krime -ne’ebé mosu iha eleisaun suku iha Builo, Postu Administrativu Ossu, Munisípiu Viqueque tanba eleisaun komunitáriu ne’e realiza iha aban loron 27 abríl 2024.
“PNTL fó seguransa masimu ba eleisaun suku no koloka ona membru sira ba kada sentru votasaun hodi akompaña prosesu eleisaun tomak. Nune’e husu komunidade atu hakmatek tuir votasaun tanba la tolera komunidade sira halo perturbasaun iha eleisaun ne’e no foti medida atusaun hodi halo prosesu tuir ne’ebé vigór”, Komandante PNTL munisípiu Viqueque, Superintendente António Rego Fernandes, hateten ba Agência TATOLI, iha serimónia distribuisaun materiál sensitivu no la sentivu ba suku Builo, ohin.
Tuir nia, eleisaun komunitária referidu la’ós ona buat foun ba komunidade sira, maibé presiza hotu-hotu nian kolaborasaun no kooperasaun hodi atinje objetivu iha eleisaun liuliu pasifiku no hakmatek.
“Ha’u mós husu ba membru PNTL sira ne’ebé koloka iha sentru votasaun fó distánsia husi 25 metru, nune’e mós husi metru 100 bandu ema labele halo barullu, bandu hemu tua no bandu lori sasán kro’at sira tanba ita hakrak eleisaun ida-ne’e tenke hetan susesu”, nia afirma.
Iha fatin hanesan, Komisáriu Komisaun Nasionál Eleisaun (CNE, sigla Portugés) destakadu munisípiu Viqueque, Olavio da Costa Monteiro, haktuir durante ne’e halo preparasaun ba eleisaun komunitária, nune’e hahú prosesu distribui materiál no presiza asegura atu aban eleitór sira husi suku Builo bele exerse sira-nia votu hodi hili lideransa suku kompostu hosi xefe suku, xefe aldeia, delegadu/a sira.
“Ha’u fiar katak komadante PNTL munisípiu Viqueque koloka ona memrbu sira ba iha kada sentru votasaun, hodi garante funsionamentu ba prosesu votasaun. Espera hahú husi distribuisaun materiál to’o iha votasaun buat hotu la’o di’k”, nia espera.
Entretantu, Sekretáriu Asuntu Sosiál munisípiu Viqueque, Acasio de Souza, akresenta ba eleisaun komunitária ida-ne’e responsavél hosi STAE, CNE, PNTL no autoridade hodi asegura seguransa atu eleisaun bele la’o ho susesu.
“Ha’u husu ba administradór postu Ossu no atuál xefe suku Builo tenke kontrola sidadaun sira no fó hanoin ba ita-nia sidadaun sira, atu apoia seguransa ba eleisaun, labele fó todan ba parte PNTL, maibé tenke hamutuk hodi asegura ba ita-nia votasaun ne’ebé hala’o iha suku Builo”, nia sujere.
Iha distruisaun materiál sensitivu no la sensitivu nee urna totál hamutuk ualo ne’ebé transporta ho karreta haat, iha tuku 10;00 dader, iha edifísiu Sekretária Administrasaun Tekniku Elorál (STAE).
Enkuantu, Tuir dadús bulletin votu ba votasaun lideransa suku ne’e hamutuk livru 19, folla hamutuk 886, bulletin votu ba xefe aldeia totál livru 47, folla hamutuk 1.238, bulletin votu ba delegadu/a totál livru 18 ho folla 886.
Materiál la sensitivu hanesan Karimbu ba eleisaun suku hamutuk 8, sellu sira 120, stiker kódigu taka urna 16 ba aldeia 4, akta aprezentasaun kandidatura ba ba xefe aldeia (AAKXA folla 16, akta aprezentasaun kandidatura ba delegadu/a aldeia folla 40 no akta eleisaun delegadu/a aldeia folla 8.
Kona-bá eleisaun suku Builo kandidatu ba xefe suku hamutuk na’in-haat inklui xefe suku atuál kompete ba eleisaun.
Tuir dadús eleitór husi suku Builo kompostu aldeia haat hanesan aldeia Buareka totál eleitór 152 ho pursentu 2%, Builo eleitór 310 ne’ebé ekivalente 3%, Derulo eleitór 259 ho 3% no aldeia Lutugia 84, ho 1% no aldeia seluk mak totál eleitór 805 ho 8%.
Notísia relevante:STAE Viqueque distribui bulletin votu ba sentru votasaun iha suku Builo
Jornalista: Vitorino Lopes da Costa
Editóra : Florêncio Miranda Ximenes
