STAE Viqueque distribui bulletin votu ba sentru votasaun iha suku Builo
VIQUEQUE, 24 abríl 2024 (TATOLI)- Sekretáriu Tékniku Administrasaun Eleitorál (STAE) munisípiu Viqueque, kuarta ne’e, finaliza ona pakotementu no ditribui ona materiál sensitivu no la sensitivu liuliu bulletin votu bá sentru votasaun iha suku Builo, Postu Administrativu Ossu, Munisípiu Viqueque.
“Materiál referidu ne’e distribui mai Viqueque iha loron 22 abríl, nune’e halo kedan verifikasaun liuliu haree ba kondisaun no ita hahú ditribui ona ba sentru votasaun iha suku Builo”, Diretór STAE Viqueque, Humberto Fernandes, hateten ba Agência Tatoli, hafoin ramata pakotementu ba materiál eleisaun ne’e, iha kna’ar fatin- Viqueque.
Notísia relevante:STAE Viqueque kapasita ona PSAS-PSAA hodi realiza eleisaun suku iha Builo
Daudaun, materiál sensitivu no materiál la sensitivu kontinua asegura iha edifísiu STAE Viqueque no hetan seguransa másimu hosi Polísia Nasionál Timor-Leste (PNTL) Viqueque.
Enkuantu, Tuir dadús bulletin votu ba votasaun lideransa suku ne’e hamutuk livru 19, folla hamutuk 886, bulletin votu ba xefe aldeia totál livru 47, folla hamutuk 1.238, bulletin votu ba delegadu/a totál livru 18 ho folla 886.
Materiál la sensitivu hanesan Karimbu ba eleisaun suku hamutuk 8, sellu sira 120, stiker kódigu taka urna 16 ba aldeia 4, akta aprezentasaun kandidatura ba ba xefe aldeia (AAKXA folla 16, akta aprezentasaun kandidatura ba delegadu/a aldeia folla 40 no akta eleisaun delegadu/a aldeia folla 8.
Kona-bá eleisaun suku Builo kandidatu ba xefe suku hamutuk na’in-haat inklui xefe suku atuál kompete ba eleisaun.
Tuir dadús eleitór husi suku Builo kompostu aldeia haat hanesan aldeia Buareka totál eleitór 152 ho pursentu 2%, Builo eleitór 310 ne’ebé ekivalente 3%, Derulo eleitór 259 ho 3% no aldeia Lutugia 84, ho 1% no aldeia seluk mak totál eleitór 805 ho 8%.
Notísia relevante:Eleitór 33.176 husi suku 10 sei partisipa eleisaun iha fulan ne’e
Jornalista : Vitorino Lopes da Costa
Editór : Florencio Miranda Ximenes
