Portugal iha kompromisu kontinua apoia Timor-Leste sai nasaun dezenvolvidu
DILI, 26 abríl 2024 (TATOLI) – Prezidente Repúblika, José Ramos Horta, akompaña husi Ministru Negósiu Estranjeiru no Kooperasaun (MNEK), Bendito dos Santos Freitas, hala’o enkontru bilaterál ho Primeiru Ministru Portugál, Luís Montenegro no Ministru Negósiu Estranjeiru Portugal, Paulo Rangel, iha Palásiu São Bento hodi diskute kona-ba reforsa relasaun diplomátika no kooperasaun ekonómika entre nasaun rua.
Enkontru referidu realiza iha ámbitu, selebra tinan 50 revolusaun ai-funan iha loron 25 Abríl (Revolusaun 6o dos Cravos 25 de Abril de 1974 – 25 de Abril de 2024), iha Lisboa Portugal.
“Primeiru Ministru ne’e foun, foin mak simu posse, entaun ita ko’alia kona-ba relasaun bilaterál no reforsu ekonómia entre nasaun rua. Ita nia relasaun ho Portugál metin, no Portugál mós kontribui makas ba ita nia luta ba auto-determinasaun,” Xefe Estadu afirma liuhusi nota ne’ebé Agência TATOLI asesu husi mídia MNEK, ohin.
Alende ne’e, parte rua ko’alia mós kona-ba adezaun Timor-Leste nian ba Oranizasaun Mundiál Komérsiu (OMK) iha fulan-fevereiru liuba, inklui adezaun ba ASEAN nian ne’ebé tuir planu iha Timor-Leste sai membru plenu iha tinan 2025.
Sorumutuk referidu akompaña mós husi Eis Xefe Estadu Maiór Jenerál F-FDTL, Tenente Jenerál Lere Anan Timur, Embaixadora Timor-Leste ba Portugal, Isabel Amaral Guterres no seluk tan.
Entretantu, Primeiru-Ministru Portugál Luís Montenegro ho nia Membru Governu sira, simu posse husi Prezidente Repúblika Portugál, Marcelo Rebêlo de Sousa, iha loron 02 fulan-abríl tinan ne’e, hodi lidera XXIV Governu Konstitusionál Portugál nian.
Molok ne’e, Prezidente Repúblika mós hala’o enkontru ho Embaixadora Portugál Iha Timor-Leste, Manuela Bairos ko’alia kona-ba Portugál sei negosia programa foun balun.
Durante enkontru diplomata Portugál ne’e, prontu apoiu joven Timor-Leste iha área oioin liuliu iha formasaun lian portugés no atividade seluk ne’ebé impotante hodi kontribui ba dezenvolvimentu.
Entretantu, Portugal no Timor-Leste nu’udar membru direitu plenu ba organizasaun luzófonia ka Komunidade hosi país ho lian Portugés (CPLP, sigla portugés), iha relasaun istórika no diplomátika.
Nasaun rua ne’e, halo ona kooperasaun oioin hanesan Edukasaun, seguransa no defeza, inklui área seluk relevante.
Notísia relevante:Xefe Estadu sei partisipa selebrasaun aniversáriu revolusaun ai-funan iha Portugal
Jornalista: Hortencio Sanchez
Editór : Florencio Miranda Ximenes
