PPN apela sidadaun hotu mantein pás iha eleisaun suku

DILI, 26 abríl 2024 (TATOLI)—Prezidente Parlamentu Nasionál (PPN), Maria Fernanda Lay, apela sidadaun hotu atu nafatin mantein pás no estabilidade iha ámbitu eleisaun ba suku 10 ne’ebé sei realiza iha sábadu aban 27 abríl 2024.
Notísia Relevante: Kandidatura 41 admitidu sei kompete ba eleisaun órgaun suku iha 27 abríl
“Ha’u hanoin katak, ita-nia lei klaru tebe-tebes. Demokratikamente, ita bele hala’o ita-nia atividade eleitorál no ita komprova iha mundu Internasionál katak, transparante klaru katak manán ou la manán, ita hateten halo ida-ne’e no ne’eba la kontrola,” PPN ne´e hateten iha resintu Parlamentu, sesta ne’e.
Lidér másimu órgaun soberania daruak ne’e mós husu ajente sira-ne’ebé iha terrenu atu tau matan hodi eleisaun ne’e tuir duni vontade povu nian.
Enkuantu, tuir kalendáriu iha 27 abril 2024 sei realiza eleisaun ba suku 10 ho ninia aldeia hamutuk 53.
Iha munisípiu Dili, postu administrativu Cristo Rei, suku ida mak Ailoc ho ninia aldeia lima. Postu administrativu Dom Aleixo iha suku Bebonuk, Madohi no Manleuana ne´e aldeia hamutuk 28. Postu administrativu Metinaro iha suku ida naran Manteloão ho aldeia hamutuk neen.
Iha munisípiu Aileu, postu administrativu Laulara iha suku Bocolelo ho aldeia hamutuk haat. Postu administrativu Aileu iha suku Lequitura ho aldeia haat,
Iha munisípiu Manatuto, postu administrativu Lacló iha suku Laicore ho aldeia haat, iha suku Uma-Caduac aldeia ida. Postu administrativu Barique, suku Sikone-Diloli ho aldeia hamutuk rua (2).
Iha munisípiu Viqueque, postu administrativu Ossu, iha suku Builo ho aldeia haat.
Notísia Relevante: Eleisaun ba suku 10 realiza iha loron 27 abríl
Jornalista : Nelson de Sousa
Editór : Cancio Ximenes

