DILI, 26 abríl 2024 (TATOLI)—Prezidente Parlamentu Nasionál (PPN), Maria Fernanda Lay, kontinua orienta komisaun G ne’ebé trata asuntu Edukasaun, Juventude Desportu no Kultura, hodi akompaña profesór kontratadu sira-nia problema antigu hodi bele buka solusaun.
Notísia Relevante: Reprezentante povu iha esperansa ME bele solusiona problema antigu manorin-na’in kontratadu
Nia hatutan, ohin, simu audiénsia daruak nian ho reprezentante eis manorin kontratadu tanba sira mak husu, tanba plenária foin lalais PN halo debate ho Ministériu Edukasaun (ME), Komisaun Funsaun Públika (KFP) kona-ba prolema manorin sira-nian seidauk hetan konkluzaun.
“Ha’u fó tan serbisu ne’e ba komisaun G sei halo akompañamentu ba lei ne’ebé ohin sira temi, inklui jurista sira iha Parlamentu, ita haree took bele rezolve. Klaru sira husu mós atu hodi ba Primeiru-Ministru, ha’u dehan tenke rona lai problema ne’e saida, la rezolve mak ita lori ba Primeiru-Ministru. La’ós buat barak, enkuantu eziste própriu ministériu mak rezolve. Ha’u la gosta ba kesar asuntu ida ita bele rezolve envez lori hotu ba PM, nia iha asuntu barak,” Prezidente Parlamentu Nasionál ne´e hateten ba jornalista sira hafoin ramata audiénsia iha sala konferénsia Parlamentu Nasionál.
Notísia Relevante: Deputadu PD-CNRT apresia ME rezolve profesór kontratadu 4000-resin ba permanente
Nia hatutan, komisaun nia akompañamentu ne’e atu rona no analiza fali lei sira-ne’ebé eziste, tanba eis manorin-na’in sira-ne’e hato’o lei fó dalan, maibé KFP ho ME hato’o fali lei la fó dalan.
Tuir nia, problema ne’e interpreta lei mak la loos ka oinsá ne´e nia parte lahatene, entaun tenke verifika didi’ak oinsá mak rezolve ida-ne’e.
Antes ne’e, PPN simu audiénsia dahuluk ho antigu manorin-na’in kontratadu sira-ne’e hodi rona sira-nia preokupasaun, hafoin ne’e orienta komisaun G hodi halo akompañamentu. Tanba ne´e, komisaun konvida kedas ME, KFP hodi halo audénsia públika no hato’o relatóriu paresér hodi ikus mai realiza debate iha plenária ho ME no KFP.
“Ohin, ha’u hato’o konkluzaun serbisu komisaun G iha ona. Se ne’e seidauk kontente, ami husu tan referénsia seluk. Entretantu, iha informasaun balun ha’u lahatene iha tinan 2021 ou 2022 iha verifikasaun dadus ba profesór voluntáriu ne’ebé serbisu tempu naruk rejista, voluntáriu la tama iha ita-nia sistema ita la hatene,” nia dehan.
Portavós Eis manorin-na’in, Agostinho Pinto, hateten enkontru ho PPN hanesan audiénsia faze daruak nian hodi atualiza fila-fali liuliu rezultadu plenária ne’ebé mak hala’o tiha ona, maibé momentu ne’eba la hetan konkluzaun ida.
“Ohin ne’e, ami mai para solusaun saida mak Parlamentu bele ajuda hodi rezolve, ne’e mak ohin ami mai kontinua mantein nafatin ami-nia ezijénsia,” nia hateten.
Iha parte seluk, nia dehan, tuir informasaun ne’ebé aprezenta katak maluk manorin-na’in kontratadu iha tinan 2023 hamutuk 963 mak partisipa iha bolsa kandidatu no iha na’in-50 mak pasa, ne’e agradese no parabeniza sira-ne’ebé liu maibé sira-ne’ebé la pasa kontinua nafatin hato’o ezijénsia.
Notísia Relevante: PPN Maria Fernanda Lay rona profesór kontratadu sira-nia preokupasaun
Jornalista : Nelson de Sousa
Editór : Cancio Ximenes
