SEF sensibiliza ona populasaun iha Dili kona-ba polítika bandu tesi ai arbiru
DILI, 26 Abríl 2024 (TATOLI) – Sekretaria Estadu Floresta (SEF) sensibiliza ona komunidade iha Dili, liuliu iha parte Comoro no Hera, kona-ba polítika Governu nian ne’ebé bandu tesi ai arbiru iha foho-lolon sira.
“Ita halo ona sensibilizasaun no hili suku Comoro no Hera-Metinaro hodi hala’o atividade sensibilizasaun, iha faze dahuluk, atu sira hetan informasaun nune’e bele redús ona atividade tesi ai ho ilegál iha kapitál”, Sekretáriu Estadu Floresta, Fernandino Viera, dehan iha Caicoli, ohin.
Nia salienta bainhira komunidade sira tesi ai beibeik sei hamosu dezastre naturál iha tempu udan monu rai, nune’e ho divulgasaun ne’e bele proteje no konserva rekursu floresta sira, tanba sidadaun hotu-hotu iha responsabilidade atu halo asaun prevensaun ne’e.
“Ba futuru maka sensibilizasaun ne’ebé governu halo ona, maibé komunidade sira kontinua kontra, guarda florestál ninia obrigasaun halo intervensaun hodi hapara, liuhusi serbisu operasaun hodi prende komunidade sira ne’ebé kontinua tesi ai no fa’an”, afirma.
Xefe Suku Comoro, Elígio José Marçal, haktuir katak área Comoro mós kategoria tama iha risku ba inundasaun, tanba ne’e kuandu SEF hili suku Comoro hodi fahe informasaun kona-ba prevensaun dezastre naturál, liu husi atividade hapara tesi ai iha foho-lolon sira iha Dili ne’e importante duni.
“Ita espera komunidade bele komprende hodi kontribui ba prevensaun risku dezastre naturál, liu husi hapara tesi ai iha foho-lolon iha área Comoro no fatin sira seluk iha nasaun ne’e”,dehan.
Partisipa iha atividade sensibilizasaun ne’ebé realiza iha suku Comoro mak ferik-katuas, joven feto no mane sira.
Antes halo divulgasaun ba informasaun, Ministériu Agrikultura, Pekuária, Peska no Floresta (MAPPF), liuhusi SEF halo uluk ona diskusaun téknika ho autoridade xave sira iha Dili atu preve komunidade labele halo atividade tesi ai ilegál. Enkontru ba dahuluk ne’e envolve administradór postu, xefe suku, autoridade polisiál sira, Autoridade Protesaun Sivíl, hodi diskute serbisu tékniku kona-ba oinsá atu evita atividade tesi ai ilegál iha kapitál.
Dadus husi MAPPF hatudu katak, kada tinan, Timor-Leste lakon ninia rekursu ai-laran 1,7% ekivale ba área ektare rihun 10, tanba atividade tesi ai ilegál ne’ebé komunidade sira iha nasaun ne’e halo.
Notísia relevante: Diskusaun téknika ba prevensaun atividade tesi ai ilegál envolve autoridade sira
Jornalista: Tomé Amado
Editora: Maria Auxiliadora
