COVALIMA, 26 Abríl 2024 (TATOLI) – Tribunál Judisiál Primeira Instánsia Suai adia julgamentu ba arguida CS ne’ebé komete krime eleitorál iha ámbitu eleisaun parlamentár 2023 iha postu administrativu Bobonaro, tanba tenta atu halo votasaun dalarua.
Defensór Públiku, Jonas Hendrique da Costa, informa, tuir loloos, prosesu julgamentu hala’o ohin, maibé arguida ho kondisaun grávida, tanba ne’e nia labele dezloka husi Bobonaro bá Covalima hodi tuir julgamentu.
“Bazeia ba informasaun husi ofisiál justisa katak julgamentu tuirmai Tribunál hala’o movel iha Bobonaro, tanba arguida partu ona, nune’e bele marka ona prezensa iha julgamentu”, Jonas Hendrique adianta iha Covalima, ohin.
Iha fatin hanesan, Vise-Prezidente Komisaun Nasionál ba Eleisaun, Domingos Barreto, dehan nia marka prezensa iha tribunál atu partisipa julgamentu relasiona ho krime eleitórál ne’ebé komete husi arguida.
“Ita hatene iha kódigu penál artigu 220, 209 to’o 243 regula kona-ba krime ne’ebé akontese molok eleisaun, iha eleisaun no hafoin eleisaun. Kazu ne’e akontese iha faze eleisaun, nia tenta vota doubru hanesan nia vota iha sentru votasaun ida hafoin vota fali iha sentru votasaun seluk”, nia esplika.
Ho krime eleitórál ne’e mak Komisaun Nasionál ba Eleisaun submete prosesu ba Ministériu Públiku (MP) no MP mak prepara investigasaun no halo akuzasaun hodi haruka ba iha tribunál.
“Loloos, ohin tuku 09:30 halo julgamentu, maibé la konsege realiza tanba arguida ho kondisaun grávida no haree distánsia husi Bobonaro mai to’o iha Covalima kondisaun estrada aat”, dehan.
Tribunál Judisiál Primeira Instánsia Suai rejista kazu krime eleitorál ho númeru prosesu (NUC) 004/23.BBBBV ne’ebé CNE simu notifikasaun iha Abríl 2024 no ohin adia audiénsia julgamentu no sei halo julgamentu movél iha munisípiu Bobonaro iha tuku 10:00, loron 25 Jullu 2024.
Rekorde katak CS (27) hanesan fiskál partidu Kmanek Haburas Unidade Nasionál Timor Oan (KHUNTO) tenta vota dalarua iha eleisaun parlamentár iha 21 maiu 2023, maibé fiskál husi partidu CNRT identifika irregularidade ne’e tanba arguida nia liman iha ona tinta, nune’e Polísia Eskuadra Bobonaro asegura kedan nia no halo prosesu investigasaun no submete kazu ne’e ba Ministériu Públiku hodi hein notifikasaun dahuluk atu loke prosesu kontinuasaun.
Bazeia ba rezultadu investigasaun katak suspeita ne’e vota dahuluk iha estasaun votu Taimea, iha suku Malilait, postu Bobonaro, hafoin ida-ne’e ba ezerse tan direitu votu iha sentru votasaun eis eskola Xina, aldeia Mailu, suku Malilait.
Notísia relevante: Kazu vota doubru iha Malilait, PNTL submete ona Ministériu Públiku
Jornalista: Celestina Teles
Editora: Maria Auxiliadora
