MALIANA, 25 maiu 2023 (TATOLI) – Kazu ne’ebé deskonfia fiskal partidu Kmanek Haburas Unidade Nasionál Timor Oan (KHUNTO) inisiál CS (27), vota doubru iha eleisaun parlamentár 21 maiu ne’e, Polísia Nasionál Timor-leste (PNTL) munisípiu Bobonaro, submete ona Ministériu Públiku hodi hein notofikasaun dahuluk atu loke prosesu kontinuasaun.
Notísia relevante: PNTL hahú investiga fiskal KHUNTO vota doubru iha Malilait
“Kazu ne’e ita prosesu ona, ita rejista ona iha Ministériu Públiku, ita hein notifikasaun atu loke prosesu seluk,” Komandante PNTL Munisípiu Bobonaro, Superintendente Xefe Atoninho Mauluta, informa ba jornalista sira, iha kana’ar-fatin, Maliana, kinta ne’e.
Superintendente Xefe ne’e haktuir, bazea ba rezultadu investigasaun katak suspeita ne’e vota dahuluk iha estasaun votu Taimea, suku Malilait, hafoin ida-ne’e ba ezerse votu dala-ida tán iha sentru votasaun eis eskola Xina, aldeia Mailu, suku Malilait.
Durante prosesu investigasaun la’o CS mós deklara ba Polísia hodi rekoñese k nia vota dala-rua duni tanba antes atu hala’o kna’ar ka papél nu’udar fiskal iha sentru votasaun la hetan formasaun ruma hosi kuadru partidu KHUNTO nian.
“Momentu ne’e iha kalan mak sira bolu nia atu sai fiskal depois fó kartaun ba nia hodi partisipa iha-ne’ebá, nia momentu ne’e bainhira nia ba vota iha fatin ida, nia mai tán iha-ne’e dehan nia ho kartaun ne’e dehan vota dala-rua. Ida-ne’e mak nia hakat tama ba vota depois nia lulun tiha ona surat-tahan ba hatama tiha atu ba tú liman iha tinta maka sira foin identifika,” nia dehan.
Enkuantu sidadaun refere dadaun ne’e iha hela nia rezidénsia aldeia Taime hodi hein notifikasaun hosi Ministériu Públiku atu loke prosesu investigasaun kle’an.
Entretantu Konabá kazu sidadaun mane na’in rua hosi Indonezía mai vota iha suku Leohitu, Balibo no suku Holsa Maliana ne’e mos PNTL submete ona ba Ministériu Públiku, inklui loke prosesu ba kazu sira seluk iha Mazop kona-bá fiskal partidu FRETILIN fasilita kartaun kredensiál ba nia maluk tuir vota.
Nune’e mós kazu sidadaun ida uza eleitorál fotokópia vota iha Tebabui, inklui kazu sira seluk ne’ebé rejista durante eleisaun parlamentár.
Notísia relevante: PNTL Bobonaro sei asegura materiál eleisaun nu’udar entidade alta
Jornalista : Sérgio da Cruz
Editór : Evaristo Soares Martins
