Agrikultór Aileu husu atu aumenta estensionista na’in-21
DILI, 27 Abríl 2024 (TATOLI) – Servisu Agrikultura Munisipál Aileu presiza ekipa téknika (estensionista) na’in-21 atu fó asisténsia ba to’os-na’in sira iha suku 33, informa Diretór Agrikultura Aileu, Pedro da Silva.
Nia dehan, Aileu daudaun ne’e iha estensionista na’in-12 de’it no númeru ne’e seidauk bele responde ba nesesidade serbisu agríkola nian atu hasa’e produsaun hare no batar.
Tanba falta rekursu estensionista atu koloka bá suku sira iha Aileu maka daudaun sira husu hela apoiu funsionáriu kazuál sira hodi ajuda hala’o hela serbisu tékniku, hodi tuun bá suku sira atu fó asisténsia ba agrikultór sira oinsá bele kuda hare no batar hodi hetan produsaun di’ak.
“Ita-nia tékniku na’in-12 durante ne’e serbisu hamutuk ho kazuál sira haleu suku hamutuk 33 iha Aileu, hodi fó asisténsia téknika ba komunidade agrikultór sira. Ita konsidera númeru ne’e limitadu liu, loloos kada suku tenke iha tékniku na’in-ida, nune’e bele halo serbisu di’ak liu”, dirijente ne’e dehan iha Comoro.
Iha sorin seluk, Diretór Nasionál Estensionista no Formasaun Agríkola, Januário Marçal, informa katak Ministériu Agrikultura nia planu atu rekruta tékniku sira hodi reforsa serbisu agrikultura ba hasa’e produsaun hare no batar iha kada munisípiu ne’e sei realiza iha tinan oin, maibé munisípiu sira daudaun ezije aumenta tékniku atu apoia serbisu.
“Ita tau ona iha konsiderasaun atu responde ba iha 2025 kona-ba falta tékniku iha kada munisípiu sira hodi koloka bá suku sira ne’ebé seidauk iha, nune’e sira bele tulun komunidade agrikultór sira hodi hala’o serbisu atu hasa’e produsaun ai-han iha rai-laran”, nia realsa.
Antes ne’e, diretór Januário Marçal informa ona katak Ministériu Agrikultura, Pekuária, Peska no Floresta sei halo rekrutamentu, iha Maiu, ba estensionista 155 hodi apoia serbisu tékniku agríkola, liuliu fó asisténsia ba to’os-na’in sira.
“Tanba ita-nia rekursu limitadu atu reforsa serbisu tékniku ba agrikultór sira, ita presiza aumenta estensionista iha tinan ida ne’e”, Januário Marçal dehan foin lalais ne’e.
Tuir dadus, ministériu iha estensionista hamutuk 376 ne’ebé rekruta iha 2008-2009, maibe agora hela de’it 317 mak ativu hodi hala’o serbisu tékniku, tanba balun mate no seluk reforma.
Notísia relevante: Ministériu Agrikultura sei rekruta estensionista 155
Jornalista: Tomé Amado
Editora: Maria Auxiliadora
