VIQUEQUE, 27 abríl 2024 (TATOLI)—Eleisaun komunitária iha suku Builo, postu administrativu Ossú, munisípiu Viqueque, sábadu ne’e, la´o ho hakmatek tanba eleitór sira ezerse sira-nai direitu votu iha sentru votasaun haat (4) la’o ho seguru.
Notísia Relevante: Eleisaun ba suku 10 realiza iha loron 27 abríl
Eeleisaun ne’e hahú iha tuku 07h00 ho preparasaun meza asembleia, tuku 8h00 ne´e kandidatu ba xefe aldeia no delegadu/a aprezenta lista iha meza asemeblia no iha tuku 09h00 ne´e eleitór sira hahú ezerse sira-nia direitu votu no taka iha tuku 15h00 lorokraik.
Xefe suku Builo atuál, Osorio da Silva, haktuir eleisaun suku Builo eleitór hamutuk 290-resin mak la partisipa iha eleisaun suku tanba klíma udan no eleitór balun hela dook husi sentru votasaun.
“Iha eleisaun ida-ne’e haree la’o di’ak no la rejista problema, maibé eleitór barak mak la partisipa iha votasaun tanba kestaun klíma udan. Ho ida-ne’e mak ami-nia eleitór balun la ezerse diretu votu,” nia hateten hateten ba jornalista sira, iha sentru votasaun suku Builo.
Tanba ne´e, nia nia husu ba abitante no eleitór sira iha suku Builo mantein kria pás no establidade durante eleisaun ne´e la’o to’o nia rohan.
Administradór postu administrativu Ossú, Felisano da Costa Guterres, hateten eleisaun suku ne´e importante tanba eleitór sira ida-idak mak sei ezerse sira-nia direitu votu hodi fihir no hili sira-nia xefe suku liuhusi votasaun.
“Eleisaun ida-ne’e ha’u sente importante tanba ita-nia eleitór sira maka hili liu husi votasaun. Nune’e votasaun ne’e ha’u akompaña hahú husi dadeer maibé ita haree buat hotu la’o hakmatek, laiha barullu ruma mosu iha sentru votasaun tanba parte ida ita-nia povu hatene demokrásia,” nia dehan.
Tanba ne’e, nia husu ba povu Builo tomak atu nafatin kria pás no establidade, nune´e lideransa foun eleitu karik tenke hamutuk hodi lori dezenvolvimentu iha suku Builo la´o di’ak.
“Ba eleisaun ida-ne’e, ha’u prefere ba povu Builo nafatin kria pás no lidarasaun sira-ne’e atu manán iha eleisaun karik hamutuk ho povu hodi kontribui ba prosesu dezenvolvimentu,” nia hateten.
Ba postu Ossu, nia dehan, antes ne´e iha suku sia (9) mak partisipa uluk eleisaun kimunitária iha 2023, no agora elisaun suku akontese ba suku Builo no hein eleitór sira hili sira-nia lideransa komunitária liuhosi eleisaun ne´e.
“Ha’u sei koopera ho xefe suku sira husi suku 10, atu lori dezenvolvimentu iha postu administrativu Ossú,” nia dehan.
Kandidatu xefe suku ne´ebé kompete iha iha eslisaun suku iha 2024 ne´e, iha suku Builo hamutuk na’in-haat (4) ne´ebé kompostu hosi númeru sorteu 1 mak Guido Danel Amaral, númeru sorteiu 2 mak Helio Ximenes de Fereira, númeru sorteiu 3 mak Osorio da Silva no númeru sorteiu 4 mak Tomas da Silva.
Eleitór sira-ne’ebé partisipa votasaun husi aldeia Lutugia eleitór na’in-45, lavota na’in-39, aldeia Buareca ne´e eleitór ne´ebé partisipa votasaun 69 no la vota eleitór 82, aldeia Derulo eleitór ne´ebé partisipa votasaun eleitór 175 no la vota 84, iha aldeia Builo neé eleitór ne´ebé partisipa votasaun 225 no la vota ne´e iha 85.
Tuir dadús eleitór husi suku Builo kompostu aldeia haat hanesan aldeia Buareka totál eleitór 152 (2%), Builo eleitór 310 (3%), Derulo eleitór 259 (3%) no aldeia Lutugia iha eleitór 84 (1%) ho totál eleitór 805 (8%).
Iha eleisaun ne’e, akompaña husi Komisáriu Komisaun Nasionál Eleisaun (CNE, sigla portugés), ekipa Sekretariadu Administrasaun Tekniku Eletorál (STAE) Viqueque no eleisaun ne’e hetan seguransa másimu husi Polísia Nasionál Timor Leste (PNTL) munisípiu Viqueque.
Notísia Relevante: Eleitór 33.176 husi suku 10 sei partisipa eleisaun iha fulan ne’e
Jornalista : Vitorino Lopes da Costa
Editór : Cancio Ximenes
