DILI, 29 abríl 2024 (TATOLI)—Bolseiru timor-oan hamutuk 5000-resin daudaun ne’e hala’o hela estudu iha nasaun 227 inklui Timor-Leste, liuhusi programa Fundu Dezenvolvimentu Kapitál Umanu (FDCH, sigla portugés).
Estudante barak liu hala’o estudu iha Universidade Timor-Lorosa’e (UNTL), Institutu of Business (IOB), Dili Institute of Technology (DIT), Universidade da Paz (UNPAZ).
“Ha’u hanoin 5000-resin ne’e iha rai-li’ur no rai-laran hotu, tanba ne’e husu ba ha’u-nia alin estudante sira atu estuda maka’as, agora ha’u nakloke ba ema hotu, no ema hotu hatene ona saida mak FDCH halo,” Diretór Ezekutivu FDCH, Júlio Aparício, informa iha ninia knaar fatin, foin lalais ne’e.
Notísia relevante : FDCH foku ba implementasaun programa prioridade haat
Orsamentu alokadu ba FDCH hamutuk $16.400.000 ba programa haat hanesan formasaun profisionál, formasaun téknika, tolu bolsa estudu no dezenvolvimentu institusionál.
FDCH tinan ne’e iha estudante méritu hamutuk 117 husi instituisaun Estadu inklui universidade sira.
“Iha 50 ne’ebé ami koloka ba reforma justisa, ami fó ba UNTL hamutuk 15, Polísia Nasionál Timor-Leste na’in-neen, ne’ebé sei estuda kona-ba perkapalan nian. Governu deside ona katak tinan-ida rekruta 1.129, ne’e inklui ba liña ministeriál sira hotu,” nia akresenta.
FDCH sei foti mellór eselente husi estudu diploma to’o doutoramentu, husi eskola ida-idak inklui ministériu sira. Maibé husi tinan 2011 to’o 2022 hamutuk 10.835, ne’ebé husi ne’e iha na’in 4.000-resin mak gradua ona.
“To’o mai agora 10.835, maibé gradua ona ne’e iha 4.000-resin, ne’ebé agora daudaun ne’e kontribui ba estadu iha Timor,” nia tenik.
Jornalista : Osória Marques
Editora : Julia Chatarina
