DILI, 29 abríl 2024 (TATOLI)— Xefe suku Lihu, Postu administrativu, Munisípiu Ermera, Bernando do Santos Babo, informa, komunidade sira iha suku ne’e asesu bee-moos maske bailoron halo bee menus tanba rai-manas.
“Iha tempu bailoron bee la maran, maibé bee menus de’it tanba rai-manas. Entaun, programa ida ne’ebé apoiu husi Ministériu Obras Públika ami hamutuk kuda ai-oan iha bee-matan sira nune’e bee labele maran,” Xefe suku Bernando dos Santos Babo, ba TATOLI, foin lalais ne’e.
Autoridade lokál ne’e relata, dezenvolvimentu ne’ebé mak la’o iha suku ne’e maioria mai husi Programa Nasionál Dezenvolvimentu Suku (PNDS).
“Entaun 2023-2024, PNDS nafatin hala’o atividade hanesan halo konstrusaun ba bee-moos ba komunidade sira maibé tempu bailoron mak bee menus tanba rai manas,” nia salienta.
Iha parte seluk, Xefe suku Lihu ne’e mós informa, liña eletrisidade iha suku referidu la iha problema tanba populasaun iha suku ne’e maioria asesu hotu ona.
Kona-ba atividade agrikultura, tuir autoridade suku ne’e katak, “Populasaun maioria moris ho agrikultór; halo to’os, produsaun ba kafé sira, hodi sustenta sira-nia moris”.
Entretantu, Suku Lihu iha aldeia haat hanesan Kamal Pun, Raiudo, Kamal Rahi, no Hi mak asesu ba bee moos no estrada. Totál populasaun iha Suku ne’e hamutuk 1.682, uma-ka’in hamutuk 349.
Iha tinan-2023 ne’e, alokasaun Orsamentu Jerál Estadu (OJE) ba Autoridade Munisipál Ermera hamutuk 8.828.787.
Notísia relevante:Estrada sai prioridade ba Ermera hodi asesu ba merkadu
Jornalista: Felicidade Ximenes
Editór: Rafael Ximenes de A. Belo
