Abitante uma-kain 64 iha Uaibobo asesu ona bee-moos ne’ebé konstrui husi Care Internasionál
VIQUEQUE, 30 abríl 2024 (TATOLI)-Abitante uma-kain 64 iha aldeia Uaibobo, suku Ossorua, Postu Adminitrasaun Ossu, munisípiu Viqueque asesu ona sistema bee-moos ne’ebé konstrui hosi Care Internasionál iha Timor Leste.
Projetu sistema bee-moos finansia Care Internasionál ho orsamentu $2.400, no konstrui iha fulan-Janeiru husi komunidade aldeia Uaibobo rasik ho distánsia kilómetru, hodi benifísia ba uma-kain 64 ho totál abitante 361.
Projetu ne’e hanesan Disastre READY ne’ebé mak hetan suporta husi Governu Australia no implementa husi konsòrsiu Australian Humanitarian Partnership (kompostu husi CARE, CAN DO, PLAN International, World Vision no Oxfam) no parseiru lokál sira.
Liu husi projetu ne’e, CARE servisu proativamentu atu hasa’e reziliènsia no redúz vulnerabilidade ba feto no labarik feto sira ne’ebé mak iha risku maka’as ba dezastre no impaktu sira husi mudansa klimàtika iha munisipiu Viqueque.
“Ha’u sente kontente tebetebes mai rona komunidade mak konstrui ativamente to’o projetu ne’e ramata. Projetu ida-ne’e atubele fasilita komunidade labele la’o ba dook mak kuru bee. Tanba ne’e Care apoia komunidade sira kanaliza sistema bee-moos ba komunidade ida-ne’e. Ba oin ami sei kontinua programa sira-ne’e ba komunidade sira iha área rurál”, Diretór Care Internasionàl iha Timor Leste, Peter Gooofellow, hateten ba Agência TATOLI,I.P baihira inaugura projetu referidu, ohin.
Projetu ida ne’e kontribui husi Autoridade Protesaun Sivil ho nia responsabilidade ba mitiga impaktu husi dezastre no fó protesaun no asistènsia ba komunidade sira liu husi inisitativa jestaun risku dezastre sira.
Governu agradese ba Care Internasionál
Entretantu, Sekretáriu Estadu Protesaun Sivil (SEPS), Domingos Mariano Reis, hateten lori Governu sia nia naran agradese ba Care ne’ebé instala sistema bee-moos ba abitante sira hosi aldeia Uaibobo.
“Ha’u lori Governu nian hakarak agradese ba parseiru Care no povu Austràlia, ne’ebe apoia ba ami-nia komunidade iha aldeia Uaibobo hodi asesu ba bee-moos”, SDomingos Mariano Reis, hateten hafoin ramata inagurasaun sistema bee-moos, iha aldeia Uaibobo, ohin.
Nune’e, Governante ne’e afirma katak, Governu liu hosi SEPS sei kontinua koopera ho parseiru sira hodi manán sira-nia komfiansa mai Timor Leste.
“Daudaun ita-nia parseiru barak maka servisu hamutuk ho SEPS hodi atende ba risku dezastre naturàl sira-ne’ebé afeta ba ita-nia povu. Rezultadu kanalizasaun bee-moos ida-ne’e komunidade Uaibobo, ha’u sei la duvida koopera ho Care hodi lori projetu mai Timor Leste”, nia afirma.
Politika Governu liuhusi SEPS atu prepara tanke konservatóriu bee-moos nian ba komunidade sira atu tama ba bailoron naruk karik bele uza bee.
“Nune’e, ha’u husu komunidade aldeia Uaibobo tenke uza fasilidade sira-ne’ebé parseiru Care konstrui ho di’ak to’o tempu naruk”, nia sujere.
Entretanu, Xefe aldeia Uaibobo, Francisco Soriono, husu agradese ba Care ne’ebé inisiativa apoia ona abitante sira ne’ebé durante ne’e kuru bee ho distànsia dook, maibé agora ba oin sei asesu bee-moos ho besik.
“Ami aldeia Uaibobo hakarak husu agradese ba Care ne’ebé tulun ona ami-nia komunidade instala fasilidade bee moos ba ami. Ho kanalizasaun ida-ne’e fó ona resposta ba ami-nia preokupasaun durante”, nia agradese
Iha serimónia inagurasaun sistema bee-moos ne’e hetan paritsipa hosi autoridade lokál, abitante Uaibobo, Autoridade Protesaun Sivil (APC) munisípiu Viqueque no funsionáriu sira husi Care.
Notìsia relevante:Care Internasionál no APC inaugura tanke bee-moos iha Luca
Jornalista : Vitorino Lopes da Costa
Editór : Florencio Miranda Ximenes
