DILI, 30 abríl 2024 (TATOLI)—Empreza responsável konstrusaun Memoriál 12 Novembru daudaun ne’e hein hela desizaun husi Governu atu liberta espasu balun iha rate Santa Cruz, nune’e bele kontinua konstrusaun.
“Finaliza tarde ne’e la’ós ami-nia sala, maibé dono do projeto, ho Komité 12 Novembru, ami hein de’it desizaun hodi halo serbisu. Maski ami manan konkursu ba konstrusaun Memoriál 12 Novembru ne’e, maibé ami halo serbisu hein orden no dehan atu sobu rate, to’o agora seidauk iha desizaun, ami hein de’it mak estátua hodi monta no sobu rate. Agora sobu rate ne’e ami hein to’o tinan-tolu ona maibé seidauk iha desizaun. Kona-ba estátua, ami halo hotu ona tau estátua fatin mak iha oin kedas, ne’ebé sei tau palaka ba ne’e,” Diretór empreza Bobolait, Lda, Carlito Pereira, informa via telefónika, sesta ne’e.
Antes ne’e, Jerente empreza Bobolait haree ona empreza balun iha Portugal atu halo estátua.
“Maibé seidauk hatene empreza ida-ne’ebé mak bele konstrui estátua ne’e. Hein atu halo segunda vizita nian hodi foti desizaun empreza ida-ne’ebé sai vensedór ba konstrusaun estátua ne’e,” nia akresenta.
Notísia relevante : Governu-K12N sei observa konstrusaun estátua 12 Novembru iha Portugál
Iha sorin seluk, Prezidente Komité 12 Novembru, Gregório Saldanha, hateten, empreza responsável sei halo segunda vizita bá Portugal hamutuk ho na’in ba projetu no Komité hodi haree empreza ida-ne’ebé mak hetan fiar no merese atu konstrui estátua.
“Ita seidauk bele finaliza tanba sei hein prosesu konstrusaun estátua. Ami nafatin hein no empreza Bobolait sei kontinua responsibilidade ba obra ne’e, maski estende no tarde, ami nafatin fó konfiansa,” nia tenik.
Aleinde ne’e, ekipa responsável sira sei aprosima família sira molok halo libertasaun espasu iha rate.
“Ami prepara sei avizu ba família sira nune’e ita ko’alia hodi loke dalan hanesan uluk ba to’o saudozu nia fatin,” nia katak.
Orsamentu ne’ebé aloka ba konstrusaun Monumentu Santa Cruz ka Memoriál 12 Novembru ne’e hamutuk $1.385.389,88.
Konstrusaun hahú konstrui iha loron 22 setembru 2021 to’o 22 setembru 2022 maibé seidauk konklui, nune’e Governu liuhusi Ministériu Asuntu Kombatente Libertasaun Nasionál (MAKLN) prolonga to’o tinan 2023 maibé seidauk hetan konkluzaun nafatin.
Antes ne’e, iha loron 13 juñu 2023, Komisaun Antí-Korrupsaun (CAC) fó sai rezultadu inspesaun ba projetu ida-ne’e, ne’ebé identifika katak tuir kontratu projetu ida-ne’e hahú implementa iha loron 22 setembru 2021 to’o 22 setembru 2022 no halo ona estensaun kontratu ba fulan-neen, maibé projetu fíziku foin atinje to’o 17,65%.
CAC mós identifika iha lakuna balun mak akontese relasiona ho dokumentu dezeñu nian.
Jornalista : Osória Marques
Editora : Julia Chatarina
