DILI, 18 janeiru 2024 (TATOLI)–Ministru Asuntu Kombatente Libertasaun Nasionál (MAKLN), Gil da Costa Monteiro “Oan Soru”, hateten ekipa tékniku MACLN hamutuk Empreza Bobolait no Komité 12 Novembru (K12N) sei ba observa fabrika ne’ebé konstrui estátua 12 Novembru iha Portugál.
Notísia Relevante: Modelu estátua 12 Novembru “joven sira kaer bandeira hamriik iha portaun leten”
“Hanesan membru Governu sei haree asuntu ne’e, ita falta de’it mak produsaun estátua entaun prosesu ne’e sei akompañia hosi tékniku MACLN nian hamutuk Komité 12 Novembru, nune’e bele haree nia prosesu ba konstrusaun. Ida-ne’e mak ita foin bele dehan hotu maibé kuandu laiha mak ita haree fali kompañia seluk,” Ministru Oan Soru hateten ba Agência Tatoli liuhosi programa “Entrevista Eskluziva” iha estúdiu Tatoli, Faról, tersa (16 janeiru 2024) ne’e.
Oan Soru rekoñese, empreza Bobolait halo konstrusaun ba monumentu ka memoriál 12 Novembru iha semitériu Santa Krus, Dili, ne’e kle’ur no lentu tebes.
“Kle’ur no kle’ur tebes. Ha’u tenke rekoñese ida-ne’e, maibé ninia kle’ur ida-ne’e konsekuénsia sai obstakulu ba kle’ur ne’e. Dala ruma mós ita dun empreza maibé mós nia sala tanba ho intensaun sira maihosi Komité 12 Novembru rasik. Entaun, hosi ne’e, ita tenke estende tan kontratu ba empreza atu sira bele aprezenta buat hotu,” nia dehan.
Maibé, nia dehan, hamutuk ho Governu mak ba aprezenta tanba ba Ministériu Planeamentu Estratéjiku ba Dezenvolvimentu hodi ko’alia hamutuk no hein nia prosesu, tanba horisehik ho horibainrua ne’e sira halo ona reuniaun ho konsultan.
“Ne’ebé, ita haree no akompañia hosi tékniku hosi MACLN nian, ne’ebé hein tan loron hirak-mai sei simu informasaun kona-ba nia rezultadu,” nia dehan.
Kona-ba estátua 12 Novembru nian ne’e, nia dehan, tuir rekomendasaun Komité 12 Novembru nian katak tenke ba frábrika iha Portugál no labele iha ne’e, depois sukat materiál mós hosi Portugál,
“Enkuantu ita iha Timor-Leste ne’e ita hatama materiál hosi Indonézia hotu, ne’ebé buat sira-ne’e kontribui mós kria obstakulu hodi kompañia la’o ba-mai,” nia hateten.
Hosi ne’e, Oan Soru esplika taka mármore iha koridór ne’ebá, ho nia medida 60X60 no nia mahar séntimu haat (4), ida-ne’e la fasil tanba iha produsaun laiha no kapasidade mákina hodi ko’a mármore ne’e mós laiha.
Konstrusaun Memoriál 12 Novembru iha Santa Krus ne’e hahú dezde VIII Governu Konstitusionál liuhusi Komisaun Nasionál Aprovizionamentu (CAN, sigla portugés) no nia prosesu konkursu ne’e liuhosi CNA maibé nia na’in mak MACLN.
Diretor Empreza Bobolait Unipesoál, Lda, Carlito Pereira, hateten prosesu konstrusaun ba finalizasaun Memoriál 12 Novembru iha Santa Crús ne’e hela item rua mak seidauk konklui mak konstrusaun estátua 12 Novembru ho nahe mármore.
“Agora kona-ba produsaun estátua ne’e ami ba mak foin haree no ami iha ona kompañia tolu iha Portugal ne’ebé mak sei halo konstrusaun ba estátua. Atu aranka ne’e hosi ekipa CAN, ekipa Ajénsia Dezenvolvimentu Nasionál, tanba tuir planu dehan estátua ne’e sei halo hanesan João Paulo II hatuur iha Tasi-Tolu no hanesan mós iha Lifau Oé-Cusse. No, sira hatama ona sira-nia proposta maibé ami sei haree nia presu no ba nia kualidade di’ak,” nia dehan.
Kompañia tolu iha Portugál ne’e seidauk hatene ida-ne’ebé mak sei manán ba konstrusaun estátua 12 Novembru, tanba presiza ba haree lai nune’e deside tanba presiza kualidade, tempu lais no presu kiik.
“Ami hakarak kompañia finaliza iha fulan hitu ka ualu, tanba sira mak halo konstrusaun estátua, sira mak transporta mai, sira mak deskarega iha aeroportu no sira mak sei monta, ami hein simu prontu nian de’it,” nia dehan.
Kontratór Empreza Bobolait Unipedsoál, Lda, ho nia orsamentu hamutuk $1.385,389,88, ba tinan ida hahú iha 22 setembru 2021 no ramata iha 22 setembru 2022, maibé labele finaliza no Governu kontinua estende to’o 2023 maibé seidauk finaliza nafatin tanba sei hein prosesu produsaun estátua 12 Novembru iha Portugál.
Notísia Relevante: Estátua ba monumentu 12 Novembru prosesa hela iha portugál
Jornalista : Osória Marques
Editór : Cancio Ximene
