DILI, 30 abril 2024 (TATOLI)–Governu no Igreja prepara fatin konsentrasaun haat ba reprezentante sarani sira husi Dioseze Baucau no Dioseze Malaiana atu tuir misa solene ne´ebé Papa Francisco prezide iha fatin istóriku no sítiu turistíku relijiozu iha Tasi-tolu.
Notísia Relevante: Preparasaun simu Papa Francisco: Empreza Eureka Gagas Utama reabilita igreja Motael
sarani sidarain sira husi diosesai Vise Kordenadór ba preparasaun vizita Papa nian hosi igreja, Padre Pároku Igreja Motael Guilhermino da Silva, dehan Governu no igreja hili fatin haat ba konsentrasaun sarani sira hosi munispiu hodi bele tuir misa Amu Papa Francisco nian iha Tasi Tolu.
“Fatin sira tama ona iha planu Governu no igreja nian hodi bele organiza sarani sira hosi munispiu no estranjeiru. Komisaun ba preparasaun nian ne’e iha Timor halo ona preparasaun no identifika fatin sira atu hela,” Vise Kordenadór ba preparasaun vizita Papa nian hosi igreja no atuál Pároku Igreja Motael, Guilhermino da Silva, hateten ba Agència Tatoli iha nia rezidensia Motael, tersa ne’e.
Nia hateten, preparasaun fatin konsentrasaun ba maluk estranjeiru sira-ne’ebé hakarak mai partisipa misa ne´e, sei prepara fatin ida iha kapela monumentu João Paulo II ne’ebé indika hanesan fatin Pelikan Paradise.
Ba reprezentante sarani sira hosi Dioseze Baucau nian hahu hosi Baucau, Lauten, Manatutu no Viqueque sei hela hotu iha fatin iha fatin konsentrasaun ida Hera, postu administrative Kristu Rei, munisípiu Dili.
Fatin konsentrasan ba reprezentante sarani sira husi munisípiu Ainaro, Aileu no Manufahi ne´e, sei kosentra iha fatin konsentrasaun ne´ebé Governu no Igreja prepara iha Beduku.
Ba reprezentante sarani sira husi munisipiu Bobonaro, Ermera, Liquiça no Rejiaun Administrativa Espesiál Oé-Cusse Ambeno (RAEOA) sei mai konsentra iha fatin konsentrasaun ida iha Portu Tíbar, Liquiça nian.
Reabilitasaun Katedrál Dili durante fulan neen
Entretantu, iha fatin ketak, Pároku Igreja Katedral de Dili, Paulos Maia, hateten preparasaun atu simu Papa Francisco vizita Timor-Leste ne´e, empreza PT Bhakti Karya (BTK) hala’o hela reabilitasaun ba Katerál Dili, ne´ebé ho durasaun tempu durante fulan neen (6) tanba preiza fulan ida atu purifika.
“Obra reabilitasaun ne’e hahú ona iha fulan-fevereiru no sei termina iha fulan jullu. Entaun, depois de reabilitasaun ne’e sei iha fulan ida ita atu halo limpeza ba preparasaun, tanba reabilitasaun ne’e orsida tinta nia dois sei iha entaun ita presiza fulan ida atu purifika,” Pároku Igreja Katedral de Dili, Paulos Maia, hateten Agència Tatoli, iha Katedrál.
Reabilitasaun ba igreja Katedrál ne’e jerál ba edifísiu tomak hodi bele simu amu Papa Francisco nia vizita pastoral ne´e di’ak.
“Antes ne’e, Dioseze Dili iha planu ona atu halo reabilitasaun ba Katedrál, koinside ho vizita Papa nian, Governu mós interven finanseira. Kona-ba vizita amu Papa nian, tuir informasaun provavelmente, Papa sei vizita Katedrál hodi halo enkontru ho relijiozu no relijioza sira iha Timor-Leste,” nia dehan.
Iha fatin hanesan, Mandór kompañia BTK, Suwarno Warno, hateten empreza halo reabilitasaun igreja ne’e einjerál hanesan pinta foun edifísiu, janela, plafon, telladu no sei pinta mós morru haleu igreja.
Responável ne’e garante, obra reabilitasaun atinje ona 70% tanba parte telladu no prediu komesa pinta plafon no sobu hotu ona.
“Ita komesa pinta prédiu no zinku ona no sei pinta tan janela no odamatan,” nia dehan.
Nia garante, obra reabilitasaun sei termina tuir tempu iha fulan-Jullu nia rohan tanba kontratu ne´e to’ o fulan-jullu ne’e.
Notísia Relevante: Papa Francisco sei vizita Timor-Leste iha 09-11 setembru 2024
Jornalista : Jesuína Xavier
Editór : Cancio Ximenes