DILI, 30 abríl 2024 (TATOLI)–Konkorrente hamutuk 77 bolsa kandidatu pasa iha vaga rua, nune’e Ministériu Edukasaun (ME) fó oportunidade hodi hili ida.
“Kandidatu profesór ne’ebé pasa vaga rua ne’e, ita sei fó oportunidade atu eskolla entre vaga rua, no sira prontu koloka ba ne’ebé de’it, ami sei kontratu sira-ne’ebé pasa iha vaga rua,” Diretora Nasionál Rekursu Umanu ME, Anita Tavares de Jesus, informa liuhusi konferénsia imprensa, hafoin enkontru ho diretór, inspetór inklui superintendente munisípiu hotu, relasiona ho kolokasaun profesór ne’ebé pasa vaga bolsa kandidatu, iha salaun ME, Vila Verde, tersa ne’e.
Daudaun hela kandidatu profesór 491 de’it, tanba ne’e bainhira halo kolokasaun presiza halo análiza ba eskola ne’ebé maka iha duni nesesidade.
“Vaga ida-ne’e seidauk to’o Ministériu Edukasaun nia alvu, nune’e bainhira ita koloka tiha kandidatu ba munisípiu sira, ita sei loke vaga faze daruak urjentemente ba bolsa kandidatu profesór hodi bele kompleta 2.400 ne’e,” nia akresenta.
Notísia relevante : KM autoriza loke teste bolsa kandidatu faze daruak
Diretór Jerál Edukasaun Pre-Eskolár, Ensinu Báziku no Ensinu Rekorrente, Apolinário Serpa Rosa, hateten, parte ME sei hein rezultadu análiza husi diretór munisipál molok koloka profesór sira.
“Tarde liu semana oin segunda feira, sira fó fila mai dadus ne’e ba rekursu umanu hafoin halo despaisu ba eskola sira-ne’ebé krítiku,” nia tenik.
Nune’e mós, Konkorrente vaga husi munisípiu Liquiçá, Alcina dos Mendes, deklara prontu simu desizaun saida de’it mak ME fó tanba manorin hanesan vokasaun ida.
“Ha’u prefere istória no jeolojia tanba daudaun ne’e, ha’u hanorin matéria ne’e, maibé filafali ba Ministériu Edukasaun, pasa iha vaga rua, ha’u prefere nafatin iha Eskola São José de Brito Maliana tanba hakarak hanorin iha Eskola Katólika,” nia tenik.
Alcina dos Mendes, hanorin iha Eskola Katólika, Santo Inácio de Loiola, durante tinan-neen, maibé bainhira kontratu ramata, nia konkorre vaga iha Eskola São José de Brito Maliano, pasa no hanorin ne’ebá.
“Ha’u dadaun ne’e hanorin hela iha Eskola São José de Brito Maliana, no konkorre vaga husi Ministériu Edukasaun, ha’u liu vaga rua, portugés no istória no jeográfika nian,” nia dehan.
Antes ne’e, konkorrente hamutuk 13.021 mak pasa selesaun dokumentu vaga bolsa kandidatu no iha na’in-11.273 maka partisipa iha teste, maibé kandidatu 1.748 admitidu iha selesaun dokumentu la marka prezensa iha teste.
Sira-ne’ebé pasa mak pasa ho valór 60 ba leten hamutuk 568, kompostu husi feto 332 no mane 236.
Sira-ne’ebé fahe ba grupu rekrutamentu hanesan Pre-Eskolár hamutuk 34, Ensinu Báziku 1º no 2º siklu hamutuk 170, ba área koñesimentu Ensinu Báziku 3º siklu, hanesan lian tétun iha 62 mak pasa ho valór 60 ba leten.
Lian portugés iha ema hamutuk 106 mak pasa, lian inglés iha 48, matemátika iha 45, siénsia naturál iha 30, siénsia sosiál iha 38 no dezenvolvimentu pesoál iha 35.
Programa bolsa kandidatu bazeia ba alterasaun dahuluk dekretu-lei nú. 31/2023 kona-ba Estatutu Kareira Dosente, ne’ebé determina sistema rekrutamentu manorin foun, liuhusi programa bolsa kandidatu. Nune’e, ME emite diploma ministerial nú. 81/2023 ne’ebé regula rekrutamentu atu ingresa iha kareira dosente.
Prosesu integra iha bolsa mós tenke ho baze ba avaliasaun koñesimentu no kompeténsia neʼebé previstu iha artigu 30 diploma ministeriál nú. 82/2023, 22 dezembru.
ME sei detemina lalais kona-ba medida tuir mai, inklui períudu kontinua halo abertura fali ba teste programa bolsa kandidatu seluk hodi kompleta ba vaga mamuk 2.400.
Jornalista : Osória Marques
Editora : Julia Chatarina
