DILI, 17 abríl 2024 (TATOLI)–Ministra Edukasaun, Dulce de Jesus Soares, halo aprezentasaun ida iha ámbitu reuniaun ordináriu Konsellu Ministru (KM), kuarta ne’e, kona-ba rezultadu husi teste eskrita ba bolsa kandidatu.
“Husi kandidatu 11.273 ne’ebé hala’o ezame, rejista de’it 568 (korresponde 5%) maka liu ka pasa. Tanba ne’e Konsellu Ministru autoriza atu loke tan teste faze daruak hodi nune’e bele atinje alvu hodi priense vaga ne’ebé sei falta iha eskola sira,” Vise-Ministru Asuntu Parlamentár, Adérito Hugo da Costa hateten, hafoin reuniaun ezekutivu, iha Palásiu Governu.
Notísia relevante : ME posibilidade loke tan vaga bolsa kandidatu profesór tanba valór menus
Teste ne’ebé hala’o husi loron 15 marsu to’o 16 abríl 2024 ho objetivu hodi selesiona kandidatu atu priense totál vaga kandidatu 2.400, ne’ebé kandidatu profesór sira bele rekruta ho fasil, tanba sira hatudu ona katak sira kumpre rekizitu tuir lei.
Teste ne’e ezije valór mínimu 60 (husi 100) no pontuasaun média ba teste hotu maka 44,4.
Programa bolsa kandidatu ba profesór sira implementa bazeia ba dekretu-lei númeru 31/2023 kona-ba Estatutu Karreira Edukadór . Tanba ne’e, ME halo prosesu rekrutamentu bazeia ba kuadru pesoál.
Iha sorin seluk, profesór 1.499 ne’ebé hanorin ona durante tinan-10 termina kontratu iha loron 31 Dezembru 2023 no ME la estende kontratu ho razaun hakarak loke vaga ba públiku hodi hetan profesór kualifikadu.
Jornalista : Antónia Gusmão
Editora : Julia Chatarina
