PN husu investiga funsionáriu halo kobransa ilegál ba sidadaun trata pasaporte

DILI, 30 abríl 2024 (TATOLI)—Membru Parlamentu Nasionál (PN) liuhusi Deputada bankada PLP, Maria Angelina Sarmento, husu atu halo investigasaun ba funsionáriu balun iha Ministériu Justisa ne’ebé deskonfia halo kobransa ilegál ba sidadaun balun ne’ebé atu trata pasaporte.
Notísia Relevante: PN apresia no sujere MJ mellora atendimentu trata pasaporte
“Iha informasaun ne’ebé iha mídia, kona-ba kobransa ilegál ne’ebé akontese iha Ministériu Justisa, ba tratamentu pasaporte ne’ebé iha indivídu balun ka funsionáriu ita lahatene, husu ilegalmente atu trata pasaporte ba benefisiáriu hodi husu entrega osan ho montante $250 bele foti iha oras 24 nia laran ou to’o loron tolu,” nia levanta liuhusi reuniaun plenária Parlamentu Nasionál, tersa ne’e.
Aleinde ne’e, Deputada husi bankada opozisaun ne’e levanta mós ho informasaun katak, akontese iha Sekretária Estadu Formasaun Profesíuonál no Empregu (SEFOPE) ne’ebé iha mós indivídu balun ne’ebé envolve direta iha prosesu rekrutamentu ba traballadór iha SEFOPE, komesa halo kobransa illegal hodi halo negósia ho kandidatu ne’ebé hola parte iha rekrutamentu ba Austrália no Korea Súl, ne’ebé akontese fó sai iha mídia sosiál kobransa husi $1000 to’o $2000.
“Ida-ne’e la aseita iha nasaun demokrátiku, kada ema uza nia kompeténsia ho forma ilegál hodi halo kobransa ilegál ho fin buka hetan oportunidade, timoroan la hola parte iha sistema liuhusi kobransa ilegál, portantu lamenta ho informasaun ne’ebé fó sai ho atetude husi indivídu balun,” ’nia hateten.
Nia husu Governu atu halo investigasaun ba indivídu balun ne’ebé prátika aktu kobransa ilegál no bele partisipa direta ba Ministériu Públiku.
Deputadu CNRT, Patrocínio dos Reis Fernandes, mós sekunda ho preokupasaun ne’e nia sujere ba Governu atu halo investigasaun tanba prátika sira-ne’e la’ós foin akontese maibé dalabarak ona.
Prezidente Parlamentu Nasionál (PPN), Maria Fernanda Lay, husu Deputadu sira nu’udar reprezentante povu iha uma-fukun Parlamentu bainhira iha faktu kona-ba kobransa ilegál ho indivídu balun bele hato’o keixa direta ba instituisaun Estadu kompetente hodi prosesa tuir dalan legál ne’ebé iha.
Iha reuniaun plenária ne’e, parte Governu liuhusi Vise Ministru ba asuntu Parlamentár, Adérito Hugo da Costa, la marka prezensa maibé iha ninia tékniku sira rejista preokupasaun Deputadu sira-nia hodi bele envia ba ministériu tutela hodi bele tau atensaun.
Jornalista : Nelson de Sousa
Editór : Cancio Ximenes

