DILI, 30 abríl 2024 (TATOLI)–Xefe Departamentu Sekretariadu Apoiu Tékniku Administrasaun Diresaun Nasionál Transporte Terrestre (DNTT), Nelson Sequeira Martins, informa, reabilitasaun parajen transporte públiku 16 iha Dili daudaun ne’e iha ona prosesu aprovizionamentu.
“Reabilitasaun parajen ne’e, daudaun iha ona prosesu aprovizionamentu, ne’ebé ita hein de’it rezultadu tanba tuir planu tinan ne’e ita sei halo reabilitasaun parajen hamutuk 16 ne’ebé harii iha tempu indonéziu,” Nelson Sequeira Martins, informa ba Agência Tatoli, iha ninia knaar fatin, DNTT, Balide, tersa ne’e.
Nia konsidera infraestrutura ne’e importante tanba integradu ho polítika IX Governu ne’ebé hakarak moderniza transporte públiku.
“Signifika sei iha mudansa ba transporte públiku nian, entaun presiza tenke iha parajen. DNTT sei haree fatin reabilitasaun parajen transporte públiku ne’ebé sai prioridade, hanesan movimentu komunidade no transporte barak,” nia akresenta.
Notísia relevante : MTK tinan ne’e sei reabilita parajen transporte públiku 16 iha Dili
Objetivu tau prioridade hadi’a parajen transporte públiku iha tinan ne’e tanba hakarak eduka pasajeiru hodi hein transporte públiku iha ninia parajen própriu, nune’e mós kondutór sira bele tula pasajeiru iha parajen.
“Ba bus sira para hotu iha terminál de’it mak tula pasajeiru, ida-ne’e sira la tama mai iha Dili laran, ba oin mós ita sei hasai regulamentu atu bus sira halai ba munisípiu tenke iha loron de’it ona, labele halai kalan. Nune’e evita asidente,” nia tenik.
DNTT prevee ona orsamentu hamutuk $140.000 atu hadi’a parajen transporte públiku.
Jornalista : Arminda Fonseca
Editora : Julia Chatarina
